Աբովյան փողոցում այսօր Նիկոլ Փաշինյանի հրաժարականի պահանջով երթի ժամանակ կարմիր բերետավորները քաշքշեցին ցուցարարներին, ուժով բերման ենթարկին «Հայաստան» դաշինքի անդամ, ոստիկանության նախկին պաշտոնյա Սայաթ Շիրինյանին։
Ոստիկանները հրելով ցանկանում էին ազատել փողոցի երթեւեկելի մասը։
Ցուցարարների մի մասը նստեց գետնին։ Տարածքում ոստիկանական մեքենաներն ավելացան։ Ուժի գործադրմամբ բերման ենթարկվեց առնվազն 15 ցուցարար։ Արդյունքում ցուցարարները հայտնվեցին մայթին։
Կարդացեք նաև
«Հայաստան» խմբակցության պատգամավորներ Գեղամ Մանուկյանի եւ Աննա Գրիգորյանի կոչով՝ քաղաքացիները մնացին մայթեզրին։
Աննա Գրիգորյանը ոստիկաններին ասում էր, որ խաղաղ երթ են անում եւ դրա իրավունքն ունեն, ոստիկանները պարտավոր են ապահովել իրենց երթի անվտանգությունը։ «Կարմիր բերետավորներն ամենաագրեսիվն են։ Ավելի վայրագ են սեւ բերետավորները՝ սադրանքի դիմեցին եւ խաղաղ ցուցարարներին բերման ենթարկեցին»,-լրագրողների հետ ճեպազրույցում նկարագրելով միջադեպի սկիզբը՝ ասաց Գեղամ Մանուկյանը։
«Ամենաահավորն այն է, որ ուսադիրով ոստիկանը բերման է ենթարկում ոստիկանության գնդապետ Սայաթ Շիրինյանին, որը հանգիստ քայլում էր ուղղակի»,-հավելեց նա։
Ապա երթն, այնուամենայնիվ, շարունակվեց Աբովյան փողոցի երթեւեկելի մասով, ինչից վայրկյաններ անց կարմիր բերետավորների խմբերն անսպասելի վրա հասան մի քանի երիտասարդի եւ բերման ենթարկեցին։ Եվս առնվազն տասը հոգու տարան, ապա քաղաքացիներին հրելով՝ կրկին ազատեցին երթեւեկելի մասը։
Կորյունի փողոցի սկզբնամասում ոստիկանները շարքերով արգելափակել են ցուցարարների ճանապարհը։
Հիշեցնենք, որ այս միջադեպի ժամանակ բերման ենթարկեցին նաեւ անչափահասի, ինչն օրենքով արգելված է։
Լուիզա ՍՈՒՔԻԱՍՅԱՆ