Մարզական ճանաչված մեկնաբան Սլավա Սարգսյանն այսօր իր ստացած տպավորությունները պատմեց օրերս Երեւանում անցկացված բռնցքամարտի տղամարդկանց Եվրոպայի առաջնության կազմակերպման մակարդակի եւ Հայաստանի ներկայացուցիչների ցույց տված արդյունքների մասին:
Սլավա Սարգսյանի խոսքով՝ այն, որ անկախ Հայաստանի պատմության մեջ առաջին անգամ էր Եվրոպայի առաջնությունն անցկացվում Երեւանում, նշանակում է, որ մեզ մոտ մարզաձեւը զարգանում է եւ վերականգնվում են անցյալի լավ ավանդույթները: «Անկախանալուց հետո որոշ դժվարություններ առաջացան ու հիմա այդ դժվարությունները, կարծես թե, հաղթահարվել են: Եվ մենք արդեն ոչ միայն բարձրակարգ մրցաշարեր ենք մեր մոտ անցկացնում, այլեւ ունենում ենք չեմպիոն, մրցանակակիրներ:
Բնականաբար, Հայաստանի ելույթները պետք է դրական համարել: Մեկ չեմպիոն, երկու արծաթ, մեկ բրոնզ: Մանավանդ, որ երկու արծաթները մոտ էին ոսկուն: Սակայն մրցանակի արժանացած մեր բռնցքամարտիկները դեռ երիտասարդ են, եւ վստահ եմ, որ հետագայում նրանք կգրոհեն նաեւ ավելի բարձր նշաձողեր: Իսկ ինչ վերաբերում է չեմպիոնին, Հովհաննես Բաչկովը նոր չի ապացուցել, որ ինքը միջազգային ստանդարտին համապատասխանող բարձրակարգ բռնցքամարտիկ է: Այնպես որ, նրա նվաճած ոսկե մեդալը միանգամայն օրինաչափ է Կարծում եմ, Բաչկովը դեռ պիտի շարունակի: Նա օլիմպիական խաղերի, աշխարհի բրոնզե մեդալակիր է: Եվ ես կուզեի, որ Բաչկովը ունենա նաեւ օլիմպիական խաղերի ու աշխարհի առաջնության ոսկե մեդալներ»,-ասաց նա:
Սլավա Սարգսյանի կարծիքով առաջնությունը լավ էր կազմակերպված: Իսկ այն միջադեպը, որ եղավ սխալ մրցավարության պատճառով, դա ինչ-որ տեղ ստվեր գցեց միջոցառման վրա: «Ամեն դեպքում սա բռնցքամարտ է, որտեղ լինում են նման դեպքեր եւ լինում են մրցավարական կոպիտ սխալներ, ինչպիսիք եղան նաեւ Երեւանում»,- ասաց մեկնաբանը:
Կարդացեք նաև
Աշոտ ՀԱԿՈԲՅԱՆ
