«Ընդդիմությանը մանդատներից զրկելու հարցը մի հատ խմբակցությունով կքննարկենք, մի հատ վարչությունով` արդյոք արժի, թե չարժի, որովհետեւ օրենքը դրա հնարավորությունը տալիս է: Կա կարծիք, որ այսպես թե այնպես` ընդդիմությունն իրեն մանդատներից զրկել է մեծ հաշվով, ես անկեղծ ասած` չեմ պատկերացնում, մեր գործընկերները էդքան բարձր նշաձող դնելուց հետո եւ էդ նշաձողի տակ մնալուց հետո ո՞նց են վերադառնալու այս դահլիճ:
Կա նաեւ երկրորդ կարծիքը` այն, ինչ մահացած է, էլ չես կարող զրկել մանդատից եւ «սպանել»: Եվ կարծիք կա, որ պետք է մինչեւ վերջ մաշեցնել այն ամենը, ինչ իրենք արեցին իրենց ներսում…Մի խոսքով, կքննարկենք, կհասկանանք»,-լրագրողների հետ զրույցում այսօր ասաց ԱԺ նախագահ Ալեն Սիմոնյանը:
«Առնվազն 10 պատգամավոր կա, որոնց բացակայությունները թույլատրելիից շատ են, 11 էր, բայց պարոն Վանեցյանը արագ հրաժարվեց, որպեսզի պրոցեսը չսկսվի: Գուցե որոշ մարդկանց դեպքում հարցը քննարկենք քաղաքական առումով, որ իրենց մասով չլինի սահմանափակում: Ինչ վերաբերվում է մնացածին, մարդիկ պետք է սովորեն պատասխանատվություն կրել» -հավելեց նա: Ասաց, որ չի բացառվում, որ ոմանք կզրկվեն նաեւ պաշտոններից:
Ինչ վերաբերում է ընդդիմադիրներին մանդատներից զրկելու հետեւանքներին եւ հնարավոր արձագանքներին, այս մասին էլ Ալեն Սիմոնյանը նշեց. «Իրենք չե՞ն վստահում իրենց ցուցակով, ասենք` 34, 35 համարներին, ցուցակով իրենց պատգամավորներն են գալու խորհրդարան, հո այդ մանդատները չե՞նք վերցնում ու տալիս Քաղաքացական պայմանագրին: Մենք կարող ենք արձանագրել, որ ընդդիմությունը զբաղված է պաշտոնակռվով եւ արդեն դա անում է բացահայտ: Իրենք ամեն ինչ թողած` զբաղվում են նրանով, որ մեկնաբանում ու բացատրում են, թե ինչի իրենց չի կարելի մանդատից զրկել…Առաջին օրվանից այս ամենը եղել է պաշտոնակռիվ նույն Դաշնակցության եւ Ռոբերտ Քոչարյանի աջակիցների համար…Սա պաշտոնակռիվ է, մանդատ ունենալու կռիվ»:
Կարդացեք նաև
Գոհար ՀԱԿՈԲՅԱՆ
