«Յուրի Խաչատուրովին ձերբակալելով, որը ՀԱՊԿ գլխավոր քարտուղար էր, մեծ հարված հասցվեց հայ-ռուսական հարաբերություններին ու հիմա ամբողջ օրը «վայնասուն» է,թե ՀԱՊԿ-ը ինչու չի խառնվում»,- այսօր «Անվտանգություն եւ ժողովրդավարություն» ՀԿ-ի նախաձեռնած «Չդադարող պատերազմ. ինչպես եւ ով բերեց» թեմայով քննարկման ժամանակ ասաց ռազմական փորձագետ Կարեն Վրթանեսյանը:
Նա ասաց, որ 2018-ի հետո երկրապահը ջախջախվեց, «տուշոնկաների» գործը սարքվեց Մանվել Գրիգորյանի գլխին, հետո քրեական գործում ոչ մի «տուշոնկայի» հարց էլ չէր շրջանառվում. «ԵԿՄ-ն մոբիլիզացիոն համակարգ էր, որ 2016-ի ապրիլյան մարտերի ժամանակ ընդամենը 1-2 օրում 3000 մարդ մոբիլիզացրել էր, տարել էր դիրքեր, իսկ 44-օրյա պատերազմի ժամանակ 6-րդ օրը նոր իրենց առաջին ստորաբաժանումը տարան առաջնագիծ: Հրամանի էին սպասում: Տարբերությունը տեսեք, թե ընդամենը 2 տարում աշխատող կառույցը ոնց կարելի է ավիրել»:
Նա նաեւ հավելեց, որ 2,5 տարում ՀՀ Զինված ուժերի 5 կորպուսից 4-ի հրամանատարները փոխվել են: Դա նշանակում է, որ եկել են մարդիկ, որոնք իրենց համար նոր տարածք ու համակարգ պետք է յուրացնեն, նորից ճանաչեն, այսինքն, ամեն մեկի փոփոխությունը իր հետ բերում է ենթակաների փոփոխություն: Նման փոփոխություն չէր կարելի այդքան արագ անել, միանգամից կառավարման համակարգը բերեց կաթվածահար վիճակի:
Նույնը՝ պաշտպանական շրջաններում եղավ, հրամանատարների մեծ մասը փոխվեցին: ՀՀ ԳՇ երեք պետ ենք ունեցել: Օնիկ Գասպարյանը 4 ամսից քիչ էր պաշտոնավարել, մինչեւ պատերազմը, դա շատ քիչ ժամանակ է՝ յուրացնելու համար, իսկ ադրբեջանցիները դա հաշվի էին առել. «Նաեւ ԱԱԾ-ն էր խայտառակ վիճակում՝պատերազմը դուրս եկանք 5-րդ թե 6-րդ ԱԱԾ պետով:
Կարդացեք նաև
Հնարավոր չի, որպեսզի ժամանակավոր պաշտոնակատարը որեւէ երկարաժամկետ ծրագիր իրականացնի, որովհետեւ կարող է գնա, պայմանավորվի, հետո իրեն հանեն: Համակարգը 6 ամիս դրած է եղել «պաուզայի» վրա: Ամբողջ պետական համակարգն էր փոխվում, ոչ միայն ՊՆ, ԱԱԾ: 2018-ի դեկտեմբերի արտահերթ խորհրդարանական ընտրություններից հետո 40 օր կառավարությունը չէր նշանակվում, պետությունը պաուզայի վրա դրված էր, օդից կախված էր:
Ընդհանրապես դա Նիկոլ Փաշինյանի սկզբունքն է՝ ցանկացած պրոբլեմ իր անձնական սպառնալիքի հանդեպ նա լուծում է պետությունը կանգնացնելով: Ապրիլի 10-ն էր, թե 20-ին նկարահանման էի, անձամբ եմ լսել՝ Նիկոլ Փաշինյանը մի երիտասարդի բացատրում էր, ասում էր՝ պետությունը կանգնացնում ենք ու կրում ենք: Դա է նրա սկզբունքը մինչեւ հիմա»:
Հռիփսիմե ՋԵԲԵՋՅԱՆ
