Հյուսիսային համալսարանը ՀՀ ԳԱԱ գիտակրթական միջազգային կենտրոնի հետ համատեղ կազմակերպել էր միջբուհական գիտաժողով` «Մասնագիտական կրթությունն ուսանողի աչքերով» խորագրով: Հանրապետության տարբեր բուհերից գիտաժողովին մասնակից ուսանողները իրենց առաջարկությունները ներկայացրեցին համալսարանական կրթական համակարգի բարելավման ուղղություններով:
Մասնավորապես, թեժ քննարկումներ ընթացան «բուհ-աշխատաշուկա» փոխհարաբերությունների կառուցման, ներբուհական բիզնես ինկուբատորների ներդրման, ստեղծարար շրջանավարտների թողարկման հիմնախնդիրների շուրջ:
Գիտաժողովի ընթացքում շեշտադրումներ կատարվեցին կրթական նոր տեխնոլոգիաների կիրառման խոչընդոտների վերացման ուղղությամբ: Հատկապես, ուսանողներն առաջարկում էին ակադեմիական ծանրաբեռնվածությունում լսարանային ժամերի կրճատում` փոխարենը ինքնուրույն աշխատանքի ավելացման հաշվին հետազոտական բաղադրիչի տեսակարար կշռի ավելացում: Ակտիվ քննարկումներ ծավալվեցին նաեւ մասնագիտական կրթության որակի բարձրացման ուղղություններով, կարեւորելով շրջանավարտի մրցունակ կարողությունների ձեւավորումն ու աշխատաշուկայում արագ դիրքավորվելու հնարավորությունները: Քննարկումների շրջանակից դուրս չմնացին նաեւ ոչ ֆորմալ կրթաձեւերի արդյունավետ կազմակերպման հնարավորությունները:
Գիտաժողովի ավարտին ուսանողներին հանձնվեցին մասնակցության հավաստագրեր եւ հայտարարվեց, որ լավագույն զեկույցները կհրատարակվեն Հյուսիսային համալսարանի «Հյուսիսափայլ» գիտական հանդեսի առաջիկա համարում:
Կարդացեք նաև
Արմեն ՃՈՒՂՈՒՐՅԱՆ
Տնտեսագիտության դոկտոր, պրոֆեսոր
«Առավոտ» օրաթերթ
15.10.2022
