ՀԱՊԿ խորհրդի նիստում նոյեմբերի 23-ին ՀՀ-ին օգնություն տրամադրելու առնչությամբ քննարկման ժամանակ վարչապետ Նիկոլ Փաշինյանը հայտարարել էր, որ ստորագրման ներկայացված «ՀԱՊԿ Հավաքական անվտանգության խորհրդի հռչակագրի և Հայաստանի Հանրապետությանը օժանդակություն ցուցաբերելու համատեղ միջոցառումների մասին» նախագիծը բավականաչափ վերջնական տեսքի չի բերվել, և այդ տեսքով ինքը պատրաստ չէ ստորագրել այդ փաստաթղթերը։ «Դա շատ վատ է Հայաստանի համար»,-կարծում է ԱԺ «Հայաստան» խմբակցության ղեկավար Սեյրան Օհանյանը։
Խորհրդարանում լրագրողների հետ ճեպազրույցում այսօր նա ասաց․ «ՀՀ-ն նախագահում է ՀԱՊԿ-ում եւ այդ տարում չի կարողացել համաձայնեցնել այն փաստաթուղթը, որն ինքն է ուզում ու գագաթնաժողովի ընթացքում ասում է, որ համաձայն չէ ստորագրել։ Եթե փաստաթուղթը ներկայացվել է, ուրեմն պետք է ստորագրվեր։ ՀԱՊԿ-ում կա ավանդույթ․ ղեկավարող երկրի համար նպաստող փաստաթղթեր են ընդունվում։ Չի ընդունվել, իսկ դա նշանակում է, որ ՀՀ ղեկավարությանը բանի տեղ չեն դրել»։
Սեյրան Օհանյանի խոսքով՝ նախկին իշխանությունը ՀԱՊԿ-ի հետ լրջորեն աշխատել էր եւ կառույցը գնահատական էր հրապարակել 2016թ․-ի ապրիլյան ռազմական գործողությունների առնչությամբ՝ ընդգծելով ուժի չկիրառման սկզբունքը, Վիեննայի եւ Սանկտ-Պետերբուրգի պայմանավորվածությունների անհրաժեշտությունը․ «Երբ գալիս ես իշխանության եւ փչացնում երկկողմ հարաբերությունները բոլորի հետ, ՀԱՊԿ գլխավոր քարտուղարին ձերբակալում, ապա վերաբերմունք ես ցույց տալիս կառույցի հանդեպ։ Սա անընդունելի է ռազմաքաղաքական կառույցների ներքին պայմանավորվածությունների համատեքստում»։
Կարդացեք նաև
Հարցին՝ եթե նշյալ փաստաթղթով Ադրբեջանն ագրեսոր ճանաչվեր, ապա դա ի՞նչ հետեւանք կունենար, Սեյրան Օհանյանը պատասխանեց․ «Այն, որ Ադրբեջանն ագրեսոր է եւ ագրեսիայով բռնազավթել է Արցախի եւ ՀՀ-ի տարածքները, բոլորը գիտեն։ Բայց ուժի կիրառման հետ կապված հարցերում ՀԱՊԿ-ին մեր տարածաշրջան ներքաշելն ավելի մեծ բախումների կարող է հանգեցնել։ Լուրջ մարդը փորձում է իր երկիրն ուժեղացնել՝ ուշադրություն չդարձնելով ոչ մի բանի վրա, իսկ մեր իշխանությունն ասում է՝ ամեն ինչ տանք, որ խաղաղություն լինի, եւ մյուս կողմից դատապարտում է ՀԱՊԿ-ին, գնում ներքին պայմանավորվածությունների, Սյունիքից հայկական ուժերը հետ քաշում 20 կիլոմետրով, ոչինչ չի անում ադրբեջանցիներին հետ շպրտելու համար»։
Լուիզա ՍՈՒՔԻԱՍՅԱՆ
