Ինչպես արդեն տեղեկացրել ենք, «Երկիր մեդիա» հեռուստաընկերությունն այսօր կայացած մրցույթի արդյունքում զրկվեց արտոնագրից, իսկ «Հ2»-ը կրկին հաղթող չճանաչվեց:
«Երկիր մեդիա» հեռուստաընկերության տնօրեն Բագրատ Եսայանն Aravot.am-ի հետ զրույցում առայժմ ձեռնպահ մնաց հանձնաժողովի որոշումը մեկնաբանելուց: Որոշման ամբողջական տարբերակը կողմերին կտրամադրվի եռօրյա ժամկետում. ամբողջական տարբերակին ծանոթանալուց հետո միայն, հեռուստաընկերության ներկայացուցիչները հանդես կգան հայտարարությամբ:
«Այս պահին, փաստորեն կա դատարանի որոշումով, որպես հայցի ապահովման միջոց, մրցույթից դուրս բերված մեկ սլոթ եւ ունենք երկու հեռուստաընկերություն՝ «Երկիր մեդիան» եւ «Հ2»-ը, որոնք այս մրցույթի արդյունքում հաղթող չճանաչվեցին: Ի՞նչ կլինեն հաջորդ քայլերը, իրավական ի՞նչ քայլեր է ենթադրում այս մրցույթը, դատարանում գտնվող գործը, արգելանքի տակ գտվող սլոթը եւ այլն, դեռ պարզ չէ, ուստի մեկնաբանություններ չեմ կարող տալ»,- ասաց Բագրատ Եսայանը՝ նկատելով, որ խնդիրն ավելի շատ իրավաբանների հարթությունում է, նաեւ՝ օրենքի անկատարության:
Նելլի ԳՐԻԳՈՐՅԱՆ
