Ադրբեջանը Զանգեզուրի միջանցք է ուզում, արդյոք դա կարմիր գի՞ծ պետք է լինի Հայաստանի համար եւ արդյոք դրան դեմ լինելը դառնում է «ոչմիթիզականություն» հիմա. այսօր առաջին նախագահ Լեւոն Տեր-Պետրոսյանի նախկին խորհրդական, դիվանագետ, Ժիրայր Լիպարիտյանին իր հեղինակած գրքի շնորհանդեսի ժամանակ այս հարցն ուղղեցին: Նա պատասխանեց, որ այսօրվա քննարկվող հարցերի մեջ չի ուզում մտնել, բայց կնախընտրի, որ այդ ճանապարհը միջանցք չկոչվի. «Սովորական ճանապարհից տարբեր լինի, բայց ոչ միջանցք: Անշուշտ, պետք չի տալ միջանցք, բայց խնդիրն այն է, որ եթե շատ ուշացնենք, մենք չենք տա, բայց իրենք կառնեն»:
Անդրադառնալով արտաքին քաղաքականությանը՝ Լիպարիտյանն ասաց, որ մենք երբեւէ պատրաստ չենք եղել պատասխանատվություն վերցնել ու ասել՝ լուծումը սա է, ապավինել ենք այլ երկրների, Մինսկի խմբի լուծումներին. «Ունեինք պատրանքային լուծումներ: Կարծում էինք, որ դավաճանություն է հասկանալ, թե դիմացինը ինչո՞ւ է անում այն, ինչ անում է, երբ բացատրում ենք, թվում էր արդարացնում ենք դիմացինին: Բայց դիմացինը ունի իր տրամաբանությունը, որին հավատում է այնքան, որքան մենք ենք հավատում մեր տրամաբանությանը: Մենք չհավատացինք, որ իրենց համար հայրենասիրություն կա, չհավատացինք, որ նրանք տրամաբանություն ունեն, ազգասիրություն, ինքնասիրություն ունեն, 25 տարի նվաստացրեցինք ու հետո բողոքում ենք, թե ի՞նչ են անում»:
Հռիփսիմե ՋԵԲԵՋՅԱՆ
