Երաժիշտ Սոնա Շաբոյանը տարիներ շարունակ թե՛ երաժշտության, թե՛ գինու միջոցով է խոսում Հայաստանի մասին: Նա ավարտել է Երեւանի Չայկովսկու անվան երաժշտական դպրոցի դաշնամուրի բաժինը, որից հետո մեկ տարի սովորել Երեւանի Կոմիտասի անվան պետական կոնսերվատորիայում, այնուհետեւ կրթությունը շարունակել Գերմանիայի կոնսերվատորիայում, այդտեղ էլ ավարտել է ասպիրանտուրան:
Սոնան հետագայում հաստատվել է Շվեյցարիայում, հանդես եկել մի շարք համերգներով, թողարկել ձայնասկավառակ: Նա հիմնադրել է նաեւ Heres մշակութային հիմնադրամը, որից հետո Heres wine-ը՝ համադրելով մշակույթն ու գինին։
Երաժիշտը հավաստիացնում է, որ գինով ու երաժշտությամբ ամենուր պատմում է իր հայրենիքի մասին, ինչ վերաբերում է HERES անվանմանը, ընդգծում է, որ այն լատիներենից թարգմանաբար նշանակում է ժառանգություն, իսկ թե՛ երաժշտությունը, թե՛ գինին, Սոնայի խոսքով, մաս են կազմում հայկական ժառանգության: Այս տարի մարտի 30-ից ապրիլի 6-ը Ցյուրիխում լինելու է գարնանային գինու մեծ փառատոն՝ Expovina Primavera-ն, որտեղ Հայաստանը եւս ներկայացված է տարբեր ընկերություններով: Սոնան ուրախ է, որ այլ երկրների դրոշների կողքին կլինի նաեւ Հայաստանինը։
Սեփ. լր.
Կարդացեք նաև
«Առավոտ» օրաթերթ
25.02.2023
