Կրեմլին մոտ կանգնած ռուսական «Կոմերսանտ» թերթը վերլուծել է Հայաստանի վարչապետ Նիկոլ Փաշինյանի՝ մարտի 14-ի ասուլիսը՝ զարմանք հայտնելով, որ նա Լեռնային Ղարաբաղի անվտանգության երաշխավոր է համարում Ռուսաստանը:
«Միանգամայն անսպասելի հնչեց Հայաստանի վարչապետի ևս մեկ թեզ,- գրել է թերթը և հիշեցրել Նիկոլ Փաշինյանի հայտարարությունը. «Ըստ եռակողմ հայտարարության և դրան հաջորդած Դաշնային խորհրդի որոշման՝ ՌԴ նախագահը հնարավորություն է ստացել խաղաղապահներ մտցնել Լեռնային Ղարաբաղ: Այդ ամենն արձանագրված է, Լենային Ղարաբաղի անվտանգության երաշխավորը Ռուսաստանի Դաշնությունն է»: – Թերևս հենց այդ համոզմունքից ելնելով է Նիկոլ Փաշինյանը նախօրեին հեռախոսազրույց ունեցել Ռուսաստանի նախագահ Վլադիմիր Պուտինի հետ, որի ընթացքում ընդգծել է Լաչինի միջանցքի իրավիճակի վերաբերյալ «Ռուսաստանի կողմից հասցեական արձագանքի անհրաժեշտությունը»: Այնուամենայնիվ, հարկ է նշել, որ 2020թ. նոյեմբերի 9-ի եռակողմ հայտարարության մեջ որևէ հիշատակում չկա Ռուսաստանի՝ Ղարաբաղի նկատմամբ երաշխիքների մասին»:
Պատրաստեց Վիկտորյա ԱՆԴՐԵԱՍՅԱՆԸ
