«Եթե երեխան ունի հոսպիտալացման ցուցումներ, նա պետք է հոսպիտալացվի: Մենք ունենք նաեւ էմերջենսի ծառայություն, երբ շտապ, անհետաձգելի դեպքերում կարող են երեխային օգնություն ցույց տալ, որոշակի նշանակումներ անել եւ ուղարկել տուն: Բայց ամեն ջերմություն ունենալու դեպքում չէ, որ պետք է երեխան հոսպիտալացվի»,-ասաց Առողջապահության նախարար Անահիտ Ավանեսյանը՝ ԱԺ մշտական հանձնաժողովների համատեղ նիստում 2022 թ. պետական բյուջեի կատարողականի հաշվետվության քննարկման ժամանակ:
Հարցին՝ կա՞ գնահատական, թե շտապօգնության ծառայության վրա ինչ ծանրաբեռնվածություն է դրվել իր՝ համապատասխան հրամանի պատճառով, Ավանեսյանն այսպես արձագանքեց. «Իմ հրամանը վերաբերվում է նրան, որ հիվանդանոցը պետք է հոսպիտալացնի այն դեպքերում, երբ կա դրա ցուցումը՝ երեխային շտապօգնության ծառայության միջոցով հոսպիտալացնելու: Եվ դա բեռ ավելացնում է, թե պակասեցնում է, արդեն կարեւոր չէ»:
Ի թիվս այլնի, նա նաեւ նշեց, որ 2022թ. գրանցվել է 0-5 տարեկան երեխաների մահացության ցուցանիշի նվազում, մինչեւ 1 տարեկան երեխաների մահացությունը 2022 թ. կազմել է 6,7 պրոմիլ, իսկ մինչեւ 5 տարեկան երեխաներինը՝ 7,5։ Ըստ նախարարի, 2021 թ. համեմատությամբ մեռելածնության դեպքերը նվազել են 13,5 պրոմիլից հասնելով մինչեւ 11,8-ի: Տարվա ընթացքում էլ գրանցվել է մայրական մահացության 8 դեպք։
Գոհար ՀԱԿՈԲՅԱՆ
