Սյունիքի որոշ համայնքներում ռազմական գործողությունների հետեւանքով ուսուցիչների տեղափոխումը դպրոցները դարձել է ոչ այնքան ապահով։ Այս մասին այսօր ԱԺ-ում բյուջեի կատարողականի քննարկման ժամանակ ասաց ՔՊ-ական պատգամավոր Լիլիթ Ստեփանյանը։
Նա դիմելով Սյունիքի մարզպետ Ռոբերտ Ղուկասյանին, ասաց՝ ուսուցիչներն իրենց կյանքի գնով են կազմակերպում կրթության գործընթացը, նրանք դպրոց են տեղափոխվում են Ուրալներով․ «Ուրալներով գնալ-գալուն այլընտրանքը ո՞րն է»։
Ի պատասխան հարցի մարզպետ Ռոբերտ Ղուկասյանն ասաց, որ խոսքը Որոտան համայնքի ուսուցիչների մասին է․ «Բայց վերջապես Խոտ-Որոտան ճանապարհի խնդիրն արդեն լուծվել է, շուտով ասֆալտապատման աշխատանքները կլինեն։ Այո, այդ ճանապարհը, որը ուսուցիչներն ամեն օր հաղթահարում էին, շատ դժվար ճանապարհ է, բայց հաղթեց կրթությունը, գիտակցումը, որ որքան էլ դժվար լինի, երեխաները պետք է ստանան կրթություն։ Դպրոցին նվիրաբերել ենք միկրոավտոբուս։ Հուսով եմ՝ մեքենան շուտով կծառայի իր նպատակին»։
Նելլի ԲԱԲԱՅԱՆ
