Հակակոռուպցիոն դատարանում դատավոր Վահե Դոլմազյանի նախագահությամբ այսօր կայացավ նախկին դատավոր Արուսյակ Ալեքսանյանի, նրա նախկին օգնական Թամարա Պետրոսյանի եւ փաստաբան Էրիկ Ալեքսանյանի գործով դատական նիստը, որի ընթացքում հետազոտվեցին մեղադրանքի կողմի քրեական վարույթով գրավոր ապացույցները: Սակայն նիստը ընդհատվեց, քանի որ դատավոր Վահե Դոլմազյանը հայտարարեց, որ մեկ ուրիշ գործով մեկ այլ դատական նիստ ունի նշանակված: Հաջորդ դատական նիստը նշանակվեց հուլիսի 28-ին, ժամը 12:00-ին:
Այդ օրը կշարունակվի գրավոր ապացույցների հետազոտումը, որից հետո համաձայն ապացույցների հետազոտման նախապես որոշված կարգի, կսկսվի վկաների հարցաքննության փուլը:
Հիշեցնենք, որ ՀՀ գլխավոր դատախազության մամուլի ծառայության համաձայն՝ նախաքննությամբ փաստական տվյալներ են ձեռք բերվել, որ դատավորը կատարել է ապօրինի գործողություններ՝ ակնհայտ անարդար որոշում կայացնելով եղբոր ընկերոջը կալանքից ազատելու մասին: Խոսքը վերաբերում է փաստաբան Էրիկ Ալեքսանյանի պաշտպանյալին։
Աշոտ ՀԱԿՈԲՅԱՆ
