«Ես չեմ կարծում, որ ԱՄՆ-ն կամ Եվրամիության անդամ երկրներն այնքան միամիտ են, որ հավատան Նիկոլի քաղաքականությանը կամ հավատան հայկական այլեւս գոյություն չունեցող ժողովրդավարությանը։ Ուղղակի նրանք իրենց շահերի հետապնդողն են»,- այս մասին այսօր լրագրողների հետ զրույցում ասաց ՀՀԿ կուսակցության գործադիր մարմնի անդամ Արտակ Զաքարյանը։
«Վստահ եմ, որ եթե Արմեն Աշոտյանն, օրինակ, կալանավորվեր Ֆրանսիայում կամ Բելգիայում, ապա ամբողջ Եվրամիությունը, ԱՄՆ-ն անմիջապես քաղբանտարկյալի որակումը կտային եւ կպահանջեին անմիջապես ազատ արձակել։ Այս պարագայում նրանք լռում են, եւ ոչ միայն Արմեն Աշոտյանի, այլեւ ընդդիմության բոլոր գործիչների, հայտնի ընդդիմադիրների նկատմամբ իշխանության կողմից վարվող բռնաճնշումներին։ Արեւմուտքի շատ կազմակերպությունների, պետությունների, նրանց դեսպանատների կողմից աչք է փակվում զուտ մեկ նպատակով, որպեսզի Նիկոլին հնարավորություն տան իրականացնել Հարավային Կովկասում աշխարհաքաղաքական գլոբալ խաղի իր դերը, որը ի սկզբանե ՀՀ եւ Արցախի շահերի դեմ է։ Արեւմուտքը չի էլ թաքցնում դա՝ ասելով, որ Արցախը պետք է Ադրբեջանի կազմում լինի։ Նիկոլն էլ նույն բան է ասում, հետո նույն Արեւմուտքում քննարկումներում հղում են անում Նիկոլին՝ ասելով, որ Նիկոլն է ասել։ Այսինքն՝ հստակ երեւում է, թե ինչպես են օգտագործում այս իշխանություններ կոչվածներին, բնականաբար, իրենց շահերի համար, որոնք գլոբալ շահեր են, որոնց ամենամեծ նպատակը ՌԴ ազդեցությունը կամ նրա տարածաշրջանային շահերն այստեղ չեզոքացնելն ու դուրս մղելն է»,- ասաց Արտակ Զաքարյանը։
Նա հավելեց․ «Ես վստահ եմ, որ եթե ՀՀ իշխանություն կոչվածներն Արցախի ինքնորոշման իրավունքն առաջ մղեն՝ որպես բանակցային սկզբունքներից մեկը, ԱՄՆ դեսպանը եւ ընդհանրապես պաշտոնական Վաշինգտոնը, պաշտոնական Բրյուսելը եւ պաշտոնական Մոսկվան կկանգնեն ՀՀ իշխանությունների կողքին։ Դա ՀՀ իշխանությունների անելիքն է։ Եթե չեն անում, ուրեմն այլ պետություններից մենք նեղանալու ոչ մի իրավունք չունենք»։
Կարդացեք նաև
Ռոզա ՀՈՎՀԱՆՆԻՍՅԱՆ
