«Մենք Նիկոլի «դավաճան» ասելով մեղմում ենք իր հանցանքը: Նիկոլը ցեղասպան է: Արցախը ցեղասպանելու բոլոր պայմանները ստեղծել է…Երբեք ոչ մի պարագայում չի կարելի վստահել թուրքին կամ մտածել՝ ինչ-որ տեղ հնարավոր է մեզ փափուկ վերացնի, ո՛չ, Արցախի ընկնելուց հետո կայծակնային արագությամբ, չենք հասցնելու նույնիսկ ուշքի գանք, մեզ թուրքերը ոչնչացնելու են: Վերաբնակեցումը մեզ ոչնչացնելուց հետո է լինելու: Թուրքերը չեն թողնելու, որ հայը ոտքի վրա կանգնի, մեկ հայ մնա, պատմության մեջ հիշողություն չմնա, սա է թուրքը»,- այսօր «Հայաստանի եւ Արցախի անվտանգային հիմնախնդիրները եւ լուծման ուղիները» թեմայով քննարկման ժամանակ ասաց բանաստեղծ Հուսիկ Արան:
Նրա խոսքով՝ Արցախի հարցը վաղուց օրինական լուծված է. «Էլի եմ ասել՝ Շառլ Միշել, ԱՄՆ ներկա եւ նախկին դեսպաններ, դուք հանցագործ եք, երբ փորձում եք հայտարարել կամ աչք փակել Արցախի ինքնորոշման վրա: Թող բարձր չհնչի, Արցախի հարցը վաղուց լուծված է: Հարակից 5 շրջանի հարցն էր մնում, մերոնք էլ ասում էին՝ փաթեթային լուծումով մենք կզիջենք ու ճանաչում ենք Արցախի անկախությունը: Ոչ մեկս չգիտի՝ ոնց պատահեց, որ մենք հասանք այս օրին: Պետք է մեկ վայրկյան շուտ այս իշխանությունից ազատվել եւ չմտածել, թե ով կլինի իշխանության. մեր փրկությունը սրանցից ազատվելն է: Պատերազմը սրանք են բերելու, սրանք տանելու են վերջնական կործանման»:
Արփինե ՍԻՄՈՆՅԱՆ
