Երեւանի ընդհանուր իրավասության դատարանի Կենտրոն նստավայրում, դատավոր Ջոն Հայրապետյանի նախագահությամբ, Ջրականի 5-րդ ուսումնական գումարտակի հրամանատար Իշխան Վահանյանի գործով դատական նիստի ընթացքում սեպտեմբերի 22-ին շարունակվեց տուժողների իրավահաջորդների հարցաքննությունը։
Հարցաքննվեցին զոհված զինծառայող Էրիկի հայրը և զինծառայողներից մեկի տատիկը։
Aravot.am-ը տուժողի իրավահաջորդի ներկայացուցիչ Գուրգեն Գրիգորյանից հետաքրքրվեց՝ հարցաքննվածները հիմնական հարցի հետ կապված՝ արդյոք Իշխան Վահանյանը լքե՞լ է զինծառայողներին, թե ոչ, որևէ արժեքավոր տեղեկություն հայտնե՞լ են, նա պատասխանեց․ «Առաջին հարցաքննվողն ասաց, որ լսել է, թե հրամանատարը փախել է։ Երկրորդի տատիկն ասաց, որ թոռը խոսել է իր հետ, երբ շրջափակման մեջ են եղել Վանք գյուղում՝ վեց հոգով։ Այդ ժամանակ խոսել է թոռնիկի հետ։ Նա անձամբ իրեն ասել է, որ թոռնիկը պատմել է, թե հրամանատարն իր հին վերքը փորփրել է և նստել վիրավորի տեղը ու փախել»։
Փաստաբանն ասաց, որ այս փուլում կշարունակվեն հարցաքննությունները։ Հետաքրքրվեցինք՝ նոր միջնորդություն ներկայացրե՞լ են, Գուրգեն Գրիգորյանը պատասխանեց․ «Այս փուլում հինգ միջնորդություն ներկայացրել ենք, որոնցից մեկի հետ կապված Հայկազ Գրիգորյանի մասով գործ է հարուցվել։ Իսկ մյուս չորս միջնորդությունների հետ կապված դեռ ոչինչ արված չէ»։
Կարդացեք նաև
Հաջորդ դատական նիստը տեղի կունենա սեպտեմբերի 26-ին՝ ժամը 14։30-ին։
Տաթև ՀԱՐՈՒԹՅՈՒՆՅԱՆ
