Հարավային Կորեայում անցկացված նոր հետազոտության համաձայն՝ Քովիդ-19-ով վարակվելուց հետո մեծանում է շարակցական հյուսվածքի աուտոիմունային և աուտոբորբոքային հիվանդությունների վտանգը, ինչպիսիք են ալոպեցիան (մազաթափություն), Կրոնի հիվանդությունը, փսորիազն ու վիտիլիգոն։
Հետազոտողներն ուսումնասիրել են 2020 թ․-ի հոկտեմբերից 2021 թ․-ի դեկտեմբերն ընկած ժամանակահատվածում Քովիդ-19-ով հիվանդացած ավելի քան 350 000 պացիենտների տվյալներ։ Նրանք նաև օգտագործել են 6,1 միլիոնից ավելի մարդուց կազմված վերահսկվող խմբի տվյալները։ 2 խմբում էլ մասնակիցների միջին տարիքը եղել է 52-ը և գործել է սեռային հավասարության սկզբունքը։
«Նկատելի էր որոշ հիվանդությունների կապը Քովիդ-19-ի բարդացած դեպքերի հետ»,- գրում են հետազոտողները․ «Ենթադրություններ կան, որ Քովիդ-19-ը կապվում է աուտոիմունային հիվանդությունների հետ, քանի որ ըստ երևույթին SARS-CoV-2-ը խաթարում է աուտոտոլերանտությունը և խաչաձև ռեակտիվության միջոցով առաջացնում է աուտոիմունային ռեակցիաներ, ինչը կարող է հանգեցնել աուտոիմունային հիվանդությունների զարգացման»։
Մինեսոտայի համալսարանի ինֆեկցիոն հիվանդությունների հետազոտության և քաղաքականության կենտրոնի տվյալներով, Քովիդ-19-ով պացիենտների շրջանում ավելի մեծ է օջախային ալոպեցիայի, ամբողջական ալոպեցիայի (ճաղատություն), վասկուլիտի, Կրոնի հիվանդության և սարկոիդոզի վտանգը։
Կարդացեք նաև
Ինչպես նշվում է կենտրոնի զեկույցում․ «Ամբողջական ալոպեցիայի, փսորիազի, վիտիլիգոյի, վասկուլիտի, Կրոնի հիվանդության, խոցային կոլիտի, ռևմատոիդ արթրիտի, Շյոգրենի համախտանիշի, անկիլոզացնող սպոնդիլիտի և սարկոիդոզի ռիսկերը երկարաժամկետ հեռանկարում կապվում են Քովիդ-19-ի բարդությունների հետ»։
Պատրաստեց Մարինե ԱԼԵՔՍԱՆՅԱՆԸ
Լուսանկարը՝ Kateryna Kon / Shutterstock.com
