ԱԺ արտահերթ նիստում «Հայաստան» խմբակցության պատգամավոր Գեղամ Նազարյանը հարցրեց աշխատանքի եւ սոցիալական հարցերի նախարար Նարեկ Մկրտչյանին (լուսանկարում)․ «Արդյոք Հայաստանի Հանրապետության քաղաքացիություն չստացած արցախցիները նույն կենսաթոշակն ու նպաստն են ստանալու, թե՞ տարբերակված»։ Նարեկ Մկրտչյանն ասաց, որ հոկտեմբերի 26-ին կառավարության որոշմամբ Արցախից բռնի տեղահանված անձանց տրվել է հատուկ պաշտպանության կարգավիճակ։ Դա, ըստ նախարարի, հավասար է փախստականի կարգավիճակին, ինչը նշանակում է, որ անձն արդեն իսկ ունի կենսաթոշակի ու նպաստի իրավունք։ «Սա նշանակում է, որ մեր հայրենակիցները, անկախ նրանից, կդիմեն քաղաքացիության համար, թե չեն դիմի, շարունակելով մնալ ժամանակավոր պաշտպանության կարգավիճակում, կշարունակեն ստանալ կենսաթոշակ, նպաստներ եւ այլն»,- ասաց նախարարը։
Ըստ նրա՝ բազաներն ինքնաշխատ կերպով տեղափոխվում են Հայաստան, իսկ այն անձինք, որոնք տեղահանումից հետո են ստանալու կենսաթոշակի իրավունք, ՀՀ օրենսդրությամբ սահմանված պայմաններին բավարարելու դեպքում պետք է դիմեն միասնական սոցիալական տարածքային կենտրոններ, անցնեն այն ընթացակարգերով, որոնք տարածվում են նաեւ ՀՀ քաղաքացիների վրա։
Գեղամ Նազարյանը նաեւ հարցրեց՝ արցախցիները հոկտեմբեր, նոյեմբեր ու դեկտեմբեր ամիսների կենսաթոշակները ստանալո՞ւ են, թե՞ ոչ։ Նարեկ Մկրտչյանն ասաց․ «Ես կարծում եմ, որ հոկտեմբերը, նոյեմբերը եւ դեկտեմբերը միասին վերահաշվարկ արած դեկտեմբեր ամսին կկարողանան ստանալ։ Դրա համար հրատապ ներկայացրեցինք նախագիծը, որպեսզի կարողանանք ապահովել։ Հատկացված գումարներ կան, եւ այնպես չի լինելու, որ ինչ-որ պահի մեր հայրենակիցներին ասելու ենք՝ գումար չունենք թոշակ կամ նպաստ վճարելու»։
«Հայաստան» խմբակցության պատգամավոր Թադեւոս Ավետիսյանը հարց ուղղեց պարտադիր կուտակային համակարգի շահառուների մասին։ «Արցախի Հանրապետությունից բռնի տեղահանված մեր հայրենակիցները նաեւ այդ համակարգի մասնակից են եւ ունեն կատարած վճարումներ՝ տարբեր չափերով։ Ի՞նչ է նախատեսվում իրենց իրավունքի հաստատման եւ հետագա շարունակության տեսանկյունից։ Ձեր բերած նախագծերով այս մասին կարգավորումներն ուղղակի բացակայում են»,- ասաց Թադեւոս Ավետիսյանը։
Կարդացեք նաև
Նարեկ Մկրտչյանը պատասխանեց, որ Արցախում կենսաթոշակային կուտակային առանձին ֆոնդեր են ունեցել։ Երբ մեխանիզմներ ստեղծվեն, շարունակականությունն ապահովվի, հանրությունը կտեղեկացվի։
Ռոզա ՀՈՎՀԱՆՆԻՍՅԱՆ
