Հայ եւ արաբ ժողովուրդների բարեկամությունը բազմադարյա պատմություն ունի: Փոխադարձ հարգանքի ու վստահության վրա հիմնված բարեկամությունը բացառիկ արժեք է, որի հենքը պատմամշակութային ընդհանրություններն են, փոխադարձ տնտեսական շահերը. հունվարի 16-ին ՀՀ ԱԺ-ում ողջունելով Հայաստանում ԱՄԷ Դաշնային ազգային խորհրդի պաշտպանության, ներքին գործերի եւ արտաքին հարցերով հանձնաժողովի նախագահ Ալի Ռաշիդ Ալ-Նուայիմիին եւ նրա ղեկավարած պատվիրակությանը` ասել է ՀՀ ԱԺ Հայաստան-Արաբական Միացյալ Էմիրություններ բարեկամական խմբի ղեկավար Խաչատուր Սուքիասյանը: Հանդիպմանը մասնակցել են բարեկամական խմբի անդամներ` ընդդիմադիր եւ իշխանական պատգամավորներ:
Անդրադառնալով երկկողմ փոխգործակցությանը, որն ընդգրկում է քաղաքական, տնտեսական, մշակութային եւ բազմաթիվ այլ ոլորտներ` Խաչատուր Սուքիասյանն ընդգծել է առեւտրաշրջանառության ծավալներն ավելացնելուն ուղղված ջանքերը: Բարեկամական խմբի ղեկավարը կարեւոր ձեռքբերում է համարել այն փաստը, որ 2023 թվականի արդյունքներով Էմիրությունները Հայաստանի երկրորդ ամենախոշոր առեւտրային գործընկերն է: Նա դրական ձեռքբերում է համարել ՀՀ եւ ԱՄԷ միջեւ կանոնավոր ուղիղ չվերթների առկայությունը, կարեւորել նաեւ ՀՀ քաղաքացիների համար ԱՄԷ մուտքի արտոնագրի չեղարկման արձանագրության ուժի մեջ մտնելը:
Խոսելով տարածաշրջանային անվտանգային խնդիրներից` Խաչատուր Սուքիասյանը նշել է, որ Ադրբեջանը շարունակում է իր ապակառուցողական գործողությունները, որոնք վտանգում են տարածաշրջանի կայունությունը եւ խաղաղությունը: Նրա խոսքով` Հայաստանն ունի քաղաքական կամք կարգավորելու հարաբերությունները հարեւան երկրների հետ` որդեգրելով խաղաղության օրակարգ:
«Բոլոր այս ծրագրերի իրականացման հարցում իր ներդրումը կունենա ՀՀ կառավարության առաջ քաշած «Խաղաղության խաչմերուկ» նախագիծը, որի նպատակն ինքնին, տարածաշրջանային հաղորդակցությունների վերականգնումն է եւ զարգացումը»,- արաբ գործընկերներին ասել է պատգամավորն ու նշել, որ ՀՀ համար առանցքային է, որ այս գործընթացի հիմքում ընկած լինեն երկրների ինքնիշխանության, իրավազորության, փոխադարձության եւ հավասարության սկզբունքները:
Կարդացեք նաև
«Նոր հորիզոններ պետք է կարողանանք բացել երկու երկրների միջեւ առկա հարաբերություններում», – ասել է ԱՄԷ Դաշնային ազգային խորհրդի պաշտպանության, ներքին գործերի եւ արտաքին հարցերով հանձնաժողովի նախագահ Ալի Ռաշիդ Ալ-Նուայիմին` շնորհակալություն հայտնելով ջերմ ընդունելության համար: Ընդգծելով տնտեսական համագործակցության առաջնահերթությունները` նա նշել է, որ ԱՄԷ-ն նպատակ ու ներուժ ունի ՀՀ համար ամենախոշոր առեւտրային գործընկերը դառնալու. երկու երկրները բանակցում են համապարփակ տնտեսական համագործակցությանն առնչվող արձանագրության եւ հուշագրի կնքման մասով: Ալի Ռաշիդ Ալ-Նուայիմին նկատել է, որ քաղաքական կայուն եւ ուժեղ համակարգ ունենալու համար պետք է ունենալ ուժեղ տնտեսություն եւ կոչ արել աջակցել ՀՀ կողմից բանակցող կողմին համապարփակ տնտեսական համագործակցության համաձայնագիրը հնարավորինս շուտ վավերացնել:
Հայ խորհրդարանականներն անդրադարձել են տարածաշրջանային անվտանգային խնդիրներին, «Խաղաղության խաչմերուկ» նախագծին: Ալի Ռաշիդ Ալ-Նուայիմին շեշտել է, որ ԱՄԷ-ն աջակցում է դրան եւ իրենց երկրի վարած քաղաքականությունը չի հակասում «Խաղաղության խաչմերուկ» նախագծի իրագործմանը:
Հանդիպման ընթացքում կողմերը խոսել են միջմշակութային երկխոսության խորացման մասին` բարձր գնահատելով ԱՄԷ իշխանությունների վերաբերմունքը հայկական համայնքի նկատմամբ: Կարեւորվել է պատգամավորական բարեկամական խմբերի գործունեությունը: Կողմերը հույս են հայտնել, որ առաջիկայում երկկողմ համագործակցությունը շոշափելի արդյունք կարձանագրի:
ՀՀ ԱԺ
