«Հիվանդանոցը բացվել է, դրանից հետո կա ժամանակ, երբ պետք է նախկին հիվանդանոցը իր ողջ աշխատակազմով, գույքով ու սարքավորումներով տեղափոխվի նոր տարածք»,-այսօր կառավարության նիստից հետո լրագրողների հետ ճեպազրույցում ասաց առողջապահության նախարար Անահիտ Ավանեսյանը՝ պատասխանելով հարցին՝ «Մարտունի» բժշկական կենտրոնը երեք ամիս առաջ է բացվել, սակայն այն այսօր չի աշխատում, ընդ որում, դրա հանդիսավոր բացմանը ներկա էր վարչապետը (լուսանկարում)։
Ավանեսյանի ներկայացմամբ․ «Պետք է հասկանալ, որ երբ բացում են ԲԿ-ի շենքը, դրանից հետո սկսվում է մեկ այլ գործընթաց՝ տեղափոխման կամ նոր բժշկական կենտրոնի հիմնադրման, որը պրոցես է։ Այդ պրոցեսի ընթացքում առաջանում են որոշակի լրացումներ, փոփոխություններ, որակի նկատմամբ եւս մեկ անգամ ճշտողական աշխատանքներ»։
Նախարարն ասաց, որ բացման օրը իր նշած ժամկետից ավելի երկար են տեւել տեղափոխման աշխատանքները․ «Մեզ համար ավելի կարեւոր է արդյունքը, մենք որեւէ շտապողականություն չցուցաբերելու համար պետք է հավաստիանանք, որ պրոցեսները լրիվ գործարկված են, դրանից հետո մենք եւս մենք անգամ հավաստվել ենք շինարարական տեխնիկական ամբողջ աշխատանքների որակի մեջ»։
Հիշեցնենք, որ մամուլը գրել է, որ «Մարտունի» ԲԿ-ն թեեւ 3 ամիս առաջ է բացվել, սակայն արդեն չի գործում, կիսատ շատ գործեր կան, մասնագետների խնդիր, տեխնիկական շատ հարցեր կան. նախարար Ավանեսյանը աշխատանքից ազատել է փոխնախարար Արմեն Նազարյանին եւ Առողջապահական ծրագրերի իրականացման գրասենյակի տնօրեն Երվանդ Էլիբեկյանին:
Կարդացեք նաև
Արդյոք փոխնախարարն ու ԾԻԳ-ի ղեկավարը այս ԲԿ-ի հետ կապված խնդիրների պատճառով են ազատվել աշխատանքից, այս հարցին ի պատասխան՝ նախարարն ասաց․ «Արմեն Նազարյանն արձակուրդում է։ Նրան առաջարկվել է տեղափոխվել այլ պաշտոնի՝ հաշվի առնելով մեր կապիտալ շինարարությունների մեծ ծավալը եւ այն պատասխանատվությունը, որը անհրաժեշտ է իր վրա կրի այդ գծով համակարգող փոխնախարարը, հարմար եմ գտել այլ անձի դիտարկեմ այդտեղ նշանակելը»։
Նախարարը չպատասխանեց հարցին՝ արդյոք Նազարյանն է եղել ԲԿ-ի հետ կապված պատասխանատուն։
ԾԻԳ-ի ղեկավարին պաշտոնից ազատելու մասին էլ նախարարն ասաց․ «Եվս կապված է կապիտալ շինարարությունների ընթացքի կառավարման եւ այն պահանջների կատարման հետ, որ իր առջեւ դրված է եղել։ Ես իմ կողմից ներկայացրել եմ իմ պահանջներն ու դրանց կատարման հետ կապված որոշակի արգումենտներ եւ իր դիմումի համաձայն ազատվել է աշխատանքից, համաձայն լինելով, որ գուցե չի կատարում ըստ իմ պահանջների։ Այս տեղափոխումները կապված չեն կոնկրետ «Մարտունի» ԲԿ-ի հետ, այլ ընդհանուր մեր կապիտալ շինարարության ընթացքի հետ են կապված»։
Թե ի վերջո երբ կբացվի Մարտունու հիվանդանոցը, նախարարը օր չնշեց, ասաց՝ առաջիկայում կհայտարարեն։
Նելլի ԲԱԲԱՅԱՆ
