Այսօր Երեւանի քաղաքապետարանի դիմաց «Մայր Հայաստան» շարժման առաջնորդ Անդրանիկ Թեւանյանը մամուլի հրատապ ասուլիս էր հրավիրել՝ ներկայացնելու գնահատականներ «Մայր Հայաստան» խմբակցության դեմ իրականացվող քաղաքական հետապնդումների եւ խմբակցության անդամներին մանդատից զրկելու մասին:
Նա հայտարարեց, որ իշխանությունները տոտալ հարձակման են անցել իրենց խմբակցության դեմ. «Առաջին դեպքը տեղի ունեցավ Նարինե Հայրապետյանի հետ կապված: Ինքը ոստիկանություն էր դիմել՝ հաղորդում տալու քաղաքական գործունեության հետ կապված: Իրեն ահաբեկել են եւ ստիպել են դադարեցնել այդ գործունեությունը: Խնդիրն այն է, որ ոստիկանություն դիմելուց հետո փաստացի ճնշումների արդյունքում ստիպել են իրեն հրաժարվել ցուցմունքից, ասել, որ կեղծ ցուցմունք է տվել: Հետագայում ինչ-որ անուններ են տվել, որ ինքը ասի, թե նրանք ստիպել են: Դրա արդյունքում՝ ճնշումներից խուսափելու համար, նա լքել է Հայաստանը: Սա աղաղակող դեպք է եւ այս մասին քար լռություն է տիրում իրավապահ համակարգի կողմից: Մի-երկու կցկտուր հայտարարություն են արել եւ վերջ: Դրան հաջորդեց մեր խմբակցության ավագանու անդամ Արշակ Սարգսյանի դեմ հարձակումը այն առումով, որ իրեն հետապնդել են՝ առանց պետհամարանիշի ավտոմեքենայով, օրեր շարունակ, զարմանալի է, որ այդ մեքենան առանց համարանիշի պտտվել է մայրաքաղաքում, մասնավորապես՝ Աջափնյակ համայնքում: Վերջին անգամ երբ առիթ է տվել, որ անհանգստանա, Արշակ Սարգսյանը դիմել է ոստիկանություն: Ոստիկանությունում դիմումից հետո հայտնաբերել են այդ մեքենան եւ մեքենայում գտնվող անձինք բերման են ենթարկվել: Թե ինչ նպատակ են հետապնդել, դեռ պիտի պարզվի»:
Ինչ վերաբերում է մանդատից զրկելուն, Թեւանյանն ասաց. «Երեկ հայտնի դարձավ նախագիծ, որ ՔՊԿ-ն, իր քույր կուսակցության հետ միասին նախաձեռնել է Երեւանի ավագանու արտահերթ նիստ եւ մեր ավագանու 4 անդամի նկատմամբ, նաեւ Ազգային առաջընթացի առաջին համար Հայկ Մարությանի նկատմամբ առաջարկում են իրականացնել մի պրոցես, որի արդյունքում իրենք պիտի մանդատները վայր դնեն: Խոսքը Սոնա Աղեկյանի, Գեւորգ Ստեփանյանի, Զարուհի Փոստանջյանի եւ Նարինե Հայրապետյանի մասին է: Փաստորեն, վերջինիս այնպես արեցին, որ համ երկիրը լքի, համ էլ մանդատից են ուզում զրկել: Սա մենք գնահատում ենք քաղաքական հետապնդում «Մայր Հայաստանի» նկատմամբ: «Մայր Հայաստանը» փաստացի խանգարում է իրենց: Մենք գնահատում ենք, որ այս բոլոր գործողությունները, որ արվում են իշխանությունների կողմից, մեկ նպատակ են հետապնդում՝ իրականացնելու այն բոլոր ծրագրերը, որոնք վերաբերում են ե՛ւ տեղական կյանքին, ե՛ւ համապետական»:
Անդրանիկ Թեւանյանը նշեց, որ իրենք պայքարում էին տեղական տուրքերի, կարմիր կետագծերի վճարների դեմ, հիմա էլ իշխանությունները փորձում են տրանսպորտի ուղեվարձը թանկացնել. «Շատ լավ գիտեն, որ ընդվզում է լինելու, իրենք չեն կարող դա անցկացնել առանց քվորումի ապահովման: Այդ քվորումի ապահովման համար իրենք ստիպված են լինում բացահայտել իրենց կոալիցիոն երրորդ կողմին, որը մինչեւ հիմա նպաստել է, որ քաղաքապետ ընտրվի, եւ կարմիր գծերի թանկացումների որոշումներն անցնեն: Բայց երեւի սակարկությունները ծանր են անցնում այդ երրորդի հետ, իրենք փորձում են մահակ կիրառել, որ եթե բացակայում եք քվեարկություններից, մենք ձեզ կհեռացնենք ավագանուց: Դրանով կստիպեն, որ իբր մենք իրենց թանկացումներին չխոչընդոտենք: Սա իրավական եւ քաղաքական բեսպրեդել է»:
Կարդացեք նաև
Հռիփսիմե ՋԵԲԵՋՅԱՆ
