Այսօր ԱԺ պաշտպանության եւ անվտանգության հարցերի հանձնաժողովի նիստում «Հայաստան» խմբակցության պատգամավոր Գեղամ Մանուկյանը ՊՆ փոխնախարար Կարեն Բրուտյանին հարցրեց. «Վերջերս ակտիվ խոսվում է զորամասերից Փառքի անկյունների վերացման մասին, գրավոր հարցում եմ արել ՊՆ նախարարին: ՊՆ պաշտոնական կայքից անհետացել է «Արցախյան ազատամարտ» բաժինը, ի վերջո՝ ՀՀ ՊԲ-ն ձեւավորվել է արցախյան ազատամարտի հիման վրա: Եթե Անդրանիկ Քոչարյանն ասում է՝ ՊՆ փոխնախարար եմ եղել ու բանակի հետ կապ եմ ունեցել, արցախյան ազատամարտի հիման վրա է, եթե Մելքոնյան Գագիկը գեներալ է, արցախյան ազատամարտի հիման վրա է: ՊՆ փոխնախարարը պատճառաբանում էր տեխնիկական խնդիրներով: 2,5 տարվա ընթացքում հնարավոր չէ՞ր վերացնել տեխնիկական խնդիրները ու վերականգնել այդ բաժինը»:
ՊՆ փոխնախարարը պատասխանեց, որ տեղյակ չի՝ ինչի մասին է խոսքը, դա իր պաշտոնական լիազորություններից դուրս է:
Գեղամ Մանուկյանը հարցրեց նաեւ՝ 2023-ի փետրվարի 2-ին ՊՆ-ն ԶՈՒ-ում բարեփոխումների շրջանակներում հայտարարեց բոլոր տեսակի համազգեստների դիզայնի ու տեսքի փոփոխություն, վստահեցրեցին, որ 2024-ին Հայկական բանակը աշխարհին կներկայանա նոր համազգեստով ու հանդերձանքով:
Գեղամ Մանուկյանը ցուցադրեց լուսանկարներ ու ասաց. «Սա բարձրագույն սպայական կազմի հանդերձանքն է։ Համազգեստների տարբերությունը նայեք, մարդ գետինն է մտնում»: Նա հարցրեց՝ ե՞րբ վերջապես ՀՀ զինված ուժերը նոր համազգեստ կունենան:
Կարդացեք նաև
ՊՆ փոխնախարարը պատասխանեց. «Մենք ձգտում ենք, որ այդ փոփոխությունները ոչ թե ձեւական լինեն, այլ համազգեստին իրոք չնայենք որպես շոր: Նայենք որպես գործիք, որը ֆունկցիա է իրականացնում: Ուսումնասիրում ենք միջազգային լավագույն փորձը, որի անունը կարող ենք դնել ՆԱՏՕ-ի ստանդարտներ, չնայած այնտեղ էլ այդքան միանշանակ չի: Կախված երկրից, տեղանքից, բնակլիմայական պայմաններից, ՆԱՏՕ-ի ստանդարտները շատ տարբեր են: Մենք համագործակցում ենք Ֆրանսիայի մեր գործընկերների հետ, առաջադեմ բանակ ունեցող երկրների հետ, որ այն, ինչ իրենց մոտ արվում է, տեղայնացնենք մեր մոտ: Կարվածքի որակից, գրպանների քանակից պայմանավորված՝ ամեն ծառայություն ունի իր առանձնահատկությունը: Ես կխնդրեի, որ ձեր սպասումները ոչ թե լինեն հիմա արագ անելու շուրջ, այլ լավ որակի ապրանք՝ հագուստ ունենալու շուրջ: Եթե դրա համար պետք է մի քանի տարի, այո, կլինի մի քանի տարի: Մեր երկրում նման մասնագիտական կարողություններ ունեցող ընկերություններ չկան, դրա համար քննարկում ենք միջազգային փորձագետների հետ»:
Հռիփսիմե ՋԵԲԵՋՅԱՆ
