CaseKey բիզնես խնդիրների լուծման մրցույթի գլխավոր գործընկերը 2024-ին ևս Բիբլոս Բանկ Արմենիան է։ Արդեն 2-րդ տարին անընդմեջ Բանկը կֆինանսավորի մրցույթի՝ 250-ից ավելի խելացի երիտասարդի գործնական գիտելիք ու հմտություններ սովորեցնելու նախաձեռնությունը։
CaseKey 2024-ը կմեկնարկի մայիսին: 6-ամսյա կրթական ծրագրին ներգրավված կլինեն hայաստանյան բիզնեսի առաջատար ներկայացուցիչներ ու խորհրդատվական ընկերություններ։
Ծրագրի ընթացքում մասնակիցները կլուծեն 3-4 միկրո քեյս, որոնք վերաբերելու են Հայաստանի իրական բիզնեսներին, իսկ արդեն նոյեմբերին տեղի կունենա գալա միջոցառումը, որի ընթացքում մասնակիցները կլուծեն տարվա գլխավոր բիզնես խնդիրը։
Բիբլոս Բանկ Արմենիայի գլխավոր գործադիր տնօրեն Հայկ Ստեփանյանի խոսքով, մասնակիցների՝ բիզնես հմտություններ ձեռք բերելու հետաքրքրվածությունը գովելի է։
Կարդացեք նաև
«Գործնական հմտություններն արժեքավոր են ձեռք բերած գիտելիքն իրական բիզնես իրավիճակներում կիրառելու տեսանկյունից։ CaseKey մրցույթի մասնակիցների՝ անցյալ տարվա արդյունքներից ոգևորված ենք, ինչն էլ հիմնական պատճառն է, որ այս տարի ևս համագործակցում ենք նախաձեռնության հետ։ Ուրախ եմ, որ կա նման հարթակ, որտեղ երիտասարդները հասանելիություն ունեն իրենց զարգացման համար էական նշանակություն ունեցող ռեսուրսի»,- նշում է Հայկ Ստեփանյանը։
CaseKey մրցույթի համահիմնադիր Արշակ Կարապետյանը կարծում է, որ համագործակցությունը բազմաթիվ հնարավորություններ է ստեղծում երիտասարդների համար։
«Շնորհակալություն եմ հայտնում Բիբլոս Բանկ Արմենիային երկրորդ տարին անընդմեջ որպես մեր գլխավոր հովանավորի շարունակական աջակցության համար: Սա ոչ միայն քաջալերում է մեզ, այլև մղում է նոր բարձունքների՝ ստիպելով էլ ավելի բարելավել այս տարվա մրցույթի որակը: Այս համագործակցությունը միայն մեր մասին չէ, այն ուղղակիորեն օգուտ է բերում մեր մասնակիցներին՝ նրանց տալով անգնահատելի հնարավորություններ՝ ցուցադրելու իրենց տաղանդը, կատարելագործելու իրենց հմտությունները, շփվելու և համագործակցելու ոլորտի առաջատար մասնագետների հետ դեռ ուսանողական տարիքից: Միասին մենք կերտում ենք բիզնես համայնքի ապագան»,- ասում է Արշակ Կարապետյանը։
Այս տարի միջոցառումը աճում է ոչ միայն քանակապես, այլև որակապես․ առաջին անգամ նախատեսվում է ունենալ միջազգային կրթական մասնագետների երկարատև ներգրավվածություն ծրագրում ԱՄՆ-ից և Մեծ Բրիտանիայից։
CaseKey բիզնես խնդիրների լուծման մրցույթ 2024-ի ամբողջ ընթացքում նույնպես Բիբլոս Բանկ Արմենիան կլինի մասնակիցների կողքին, կսատարի նրանց գործնական կարողությունների զարգացմանը։
Կարևորելով իմաստավորված ու դրական քայլերը՝ Բիբլոս Բանկ Արմենիան շարունակ ներդրում է կատարում առողջ, բարգավաճող համայնքներ կառուցելու գործում՝ իրականացնելով մի շարք ԿՍՊ ծրագրեր և կրթական նախագծեր:
