ԱԺ-կառավարություն հարցուպատասխանի ժամանակ ԱԺ փոխնախագահ Ռուբեն Ռուբինյանը հարցրեց Նիկոլ Փաշինյանին՝ ըստ Հայաստանի դիրքորոշման ի՞նչ հիմքով պետք է տեղի ունենա սահմանազատումը եւ սահմանագծումը։ «Եթե հատվածական պիտի արվի այն, այս փուլում ո՞ր հատվածի դելիմիտացիայի մասին ենք մենք խոսում»,- հարցրեց Ռուբինյանը։
Նիկոլ Փաշինյանն ասաց, որ երբ հարց է տրվում քարտեզի մասին, իրականում այդ հարցն այնքան էլ կոռեկտ չէ, որովհետեւ կարեւոր է քարտեզի տակ ընկած իրավական հիմքը։ «Հիմա ձեր հարցին, թե ի՞նչ իրավական հիմքի վրա պետք է իրականացվի, մենք արձանագրել ենք, որ սահմանազատման գործընթացի քաղաքական հենքը Ալմա-Աթայի հռչակագիրն է։ Հիմա մենք պետք է գնանք ու դուրս բերենք այն իրավական հիմքերը, որոնք գոյություն են ունեցել 1991 թվականին հայկական ԽՍՀ եւ ադրբեջանական ԽՍՀ միջեւ սահմանի առկայության համար։ Քարտեզները վերարտադրում են իրավական հիմքերը, այսինքն՝ իրավական հիմքն է կարեւոր»,- ասաց նա։
Փաշինյանը հավելեց․ «Ինչ վերաբերում է կոնկրետ հատվածին, որի շուրջ մենք պատրաստակամություն ենք ցուցաբերել, ես նորից այդ հատվածի վերաբերյալ ասեմ, հետեւյալ հատվածի մասին է խոսքը՝ Հայաստանի Հանրապետության տարածքից եթե նայենք, ՀՀ Բաղանիս, Ոսկեպար, Կիրանց, Բերքաբեր գյուղերի հատվածը, ադրբեջանական կողմից Բաղանիս-Այրում, Աշաղը Ասքիփարա, Խեյրիմլի և Ղըզըլհաջիլի։ Եվ ՀՀ-ն պատրաստ է այս հատվածում ամբողջական սահմանազատում իրականացնելու խորհրդային հանրապետությունների իրավասու մարմինների կայացրած որոշումների, քարտեզների եւ փաստաթղթերի հիման վրա»։
Կարդացեք նաև
Ռոզա ՀՈՎՀԱՆՆԻՍՅԱՆ
