Այսօր Հայոց ցեղասպանության 109-րդ տարելիցին նվիրված սկսվեց ամենամյա ջահերթով երթը:
«Այսօր Հայոց ցեղասպանության 109-րդ տարելիցին ընդառաջ մենք նորից համախմբվել ենք, որ մեր պահանջատիրության ջահը տանենք դեպի Ծիծեռնակաբերդի սրբազան բարձունք:
Ջահերով երթը լոկ հիշատակի ու սգո երթ չէ, այն պահանջատիրության ու արժանապատվության երթ է, հավատի, որ մի օր ցեղասպան թշնամին պիտի պատասխան տա իր գործած ոճիրների համար ու հատուցի, հատուցի վերականգնելով մեր անժամանցելի իրավունքները:
Կարդացեք նաև
Վերջին տարիները եկան ապացուցելու, որ ցեղասպանությունը լոկ պատմություն չէ, ցեղասպանությունը թուրքական պետության քաղաքականությունն է, որը չի փոխվել:
130 տարի առաջ Աբդուլ Համիդի ձեռքով, 109 տարի առաջ էնվերների, Ջեմալների, Թալեաթների ձեռքով, 30 տարի առաջ Մութալիբովների ձեռքով, այսօր արդեն էրդողանների ու ալիեւների ձեռքով թշնամին ցանկանում է ոչնչացնել մեզ, բնաջնջել մեզ մեր բնօրրանում ու քանի դեռ արժանի հարված չի ստացել, երբեք չի հրաժարվելու իր այս ցեղասպան քաղաքականությունից:
Այսօր ապրում ենք նահանջի, ապազգայնացման ու ուրացման ժամանակաշրջան, մեզ փորձում են ստիպել ուրանալ մեր պապերի արյունը, մեր սրբազան հայրենիքը: Մեզ ստիպում են հայրենիք չկոչել այն հողը, որը մեզնից խլել են զազրելի ձեւով՝ ցեղասպանությամբ, մեզ ստիպում են հրաժարվել մեր պահանջատիրությունից, բայց մենք այստեղ ենք վերահաստատելու, որ արժանապատիվ հայությունը վեր է հառնելու մոխիրներից ու պայքարելու է իր իրավունքների ու հայրենիքի վերականգնման համար ու հաղթելու է»,- նախքան երթի մեկնարկը այսպիսի հայտարարություն եղավ Հանրապետության մարդաշատ հրապարակում:
Ինչին հաջորդեց Թուրքիայի եւ Ադրբեջանի դրոշների այրումը:
Արփինե ՍԻՄՈՆՅԱՆ
