«Այսքանից հետո մեզ բան չէր մնում ասելու, քան դուք տեսաք։ Ակնհայտ է, որ կա հանձնարարություն, հանձնարարությունը կատարվելու է։ Մենք մեր առջեւ խնդիր էինք դրել ցուցադրելու, թե տարբեր մարմիններ ինչ աստիճանի են պատրաստ կատարելու այդ հանձնարարությունը եւ ինչ ակնհայտ խայտառակությամբ»,-
Միքայել արքեպիսկոպոս Աջապահյանի գործով այսօրվա դատական նիստից հետո լրագրողներին ասաց Միքայել սրբազանի պաշտպան Երեմ Սարգսյանը։
Այսօրվա դատական նիստի ավարտին դատավոր Արմինե Մելիքսեթյանը հայտարարեց, որ հաջորդ նախնական դատալսումները նշանակվում են օգոստոսի 18-ին, 19-ին, 21-ին եւ 25-ին։
Երեմ Սարգսյանը նիստից հետո լրագրողների հետ զրույցում հարցադրում արեց․ «Դուք տեսա՞ք արդարադատություն, դուք տեսա՞ք, որ դատավորը օրենքից բխող որեւէ տեսակի պատճառաբանություններ տվեց։ Ինչ ասել է, օրենքից չի բխում»։
Կարդացեք նաև
Նրա խոսքով՝ դատավորը խնդիր ունի արագ քննելու այս գործը, դատավորի այս շտապողականությունը, 10 օրով կալանքը երկարացնելը, իրար հետեւից դատական նիստեր նշանակելը՝ առանց որեւէ՝ մեկի հետ համաձայնեցնելու, դա են փաստում։ Իսկ դատավորն ի՞նչ գիտի, որ հաջորդ նիստում չի ավարտելու այս գործը, իրենց մոտ գծած է, որ իրենք ամսի 25-ի դրությամբ պետք է ավարտած լինեն այս գործը։ Դրա համար այս 10 օրն էլ տվել են, էնքան բացահայտ են անում էս ամենը, որ չենք էլ իմանում՝ ինչ խոսենք, որ ցույց տանք դատարանի ապօրինությունը։ Որեւէ այլ դատական նիստ չեք տեսնի, որ այս եղանակով է իրականացվում»։
Մանրամասները՝ տեսանյութում
Փաստաբան Մարինե Ֆարմանյանն էլ նշեց, որ ամեն ինչ այնքան արագ տեղի ունեցավ, որ փաստաբանական թիմը նույնիսկ չհասկացավ, թե ինչ կատարվեց, որպեսզի կարծիք արտահայտեին։ «Ես նույնիսկ չեմ էլ հասցրել նայել օրերը, խնդրեցի թղթի վրա մեզ գրեն ու տան, որպեսզի հասկանանք, թե ինչ օրեր են նշանակված։ Սա ցածրակարգ շտապողականություն է, այսօր դատավոր Արմինե Մելիքսեթյանը հանդես եկավ որպես ոչ արդար դատարան եւ որպես ոչ պատշաճ դատարան։ Եվ սրա իրավական հետեւանքները քրեադատավարական կարգավորումների իմաստով բոլորիս հայտնի են։ Բայց որ քաղաքական ակնհայտ ճնշում կա, եւ ամբողջ սցենարը արդեն պատրաստի վիճակում բերվել էր դատարան, դուք ինքներդ տեսաք»,- նշեց նա։
Մանրամասները՝ տեսանյութում
Նշենք, որ ըստ հրապարակված մեղադրական եզրակացության՝ «Գևորգ /Միքայել/ Արտաշեսի Աջապահյանին մեղադրանք է առաջադրվել այն բանի համար, որ նա ունենալով արքեպիսկոպոսի հոգեւոր աստիճան եւ հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետեւորդներ եւ հետեւաբար նաեւ՝ իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին եւ արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024 թվականի փետրվարի 3-ին՝ ապա նաեւ՝ 2025 թվականի հունիսի 21-ին, զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր»։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
