Կառավարության այսօրվա նիստից հետո հրավիրված ասուլիսում Նիկոլ Փաշինյանն անդրադարձավ հարցին, թե ինչո՞ւ են թաքուն պահել Ադրբեջանի փոխվարչապետ Շահին Մուստաֆաեւի այցը Երեւան։
«Եթե կոնֆիդենցիալության ինչ-որ կանոններ պահվում են, հայտնի նկատառումներով է, այդ թվում՝ անվտանգության։ Կարծում եմ՝ երբ մեր փոխվարչապետն է այցելել Ադրբեջան, նույն կանոնները պահվել են այնտեղ։ Իսկ լրատվական արտահոսքերը երբեք բացառել հնարավոր չէ։ Ադրբեջանի պարագայում չի եղել այդ արտահոսքը, Հայաստանի պարագայում եղել է։ Եվ արտահայտությունը, թե մենք հանրությունից գաղտնի ենք պահում, բացարձակապես տեղին չէ»,- ասաց նա։
Նիկոլ Փաշինյանը նշեց, որ կարծում է՝ շատ կարեւոր իրադարձություն է տեղի ունեցել։ «Երկու երկրների փոխվարչապետերի այցերը համարում եմ պատմական՝ խաղաղության գործընթացի եւ ինստիտուցիոնալացման տրամաբանության մեջ։ Եվ ես շատ ուրախ եմ, որ եկել ենք այս հանգրվանին։ Հայաստանի եւ Ադրբեջանի միջեւ հարաբերությունները պետք է շարունակաբար լավարկվեն, խաղաղությունը գնալով պետք է ուժեղանա եւ պետք է հաստատվեն բնականոն հարաբերություններ՝ երկարաժամկետում ռազմավարական առումով բարիդրացիական հարաբերություններ»,- հավելեց նա։
Մանրամասները՝ տեսանյութում
Կարդացեք նաև
Անդրադառնալով հարցին, թե ադրբեջանական կողմի հետ հայ գործարարների հանդիպման ընթացքում ի՞նչ պայմանավորվածություններ են ձեռք բերվել, Նիկոլ Փաշինյանն ասաց․ «Շատ կարեւոր է, որ արդեն գործարարների խմբերով է հանդիպում տեղի ունենում, եւ սա տրամաբանական է։ Ուզում եմ ասել, որ նոյեմբերից մինչեւ հիմա շուրջ 26 հազար տոննա ապրանքներ են Ադրբեջանի տարածքով եկել Հայաստանի Հանրապետություն։ Եվ հիմա գործնականում արգելք եւ որեւէ խոչընդոտ չկա, որ Հայաստանից ապրանքներ արտահանվեն։ Բայց պետք է հաշվի առնել, որ Հայաստանը 35 տարի աշխատել է ավտոմեքենայով արտահանելու տրամաբանությամբ։ Եվ որեւէ մեկի համար հեշտ չէ ուղղակի միանգամից տրանսպորտային միջոցը փոխել։ Եվ ես համոզված եմ, որ առաջիկայում նաեւ Հայաստանից արտահանումներ կլինեն»։
Մանրամասները՝ տեսանյութում
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
