«Ուժեղ Հայաստան» կուսակցության խորհրդի անդամ Նարեկ Կարապետյանն այսօր լրագրողների հետ հանդիպման ժամանակ չմեկնաբանեց տեղեկությունները, թե կառավարությունը Կարապետյանների ընտանիքին առաջարկել է ձեռքբերել ՀԷՑ-ը 23,3 միլիարդ դրամով՝ պայմանով, որ ընկերությանը պետք է վերադարձվի վերջին տասը տարվա շահաբաժինը:
«Մենք չենք մեկնաբանում այդպիսի տեղեկություններ, որովհետեւ ՀԷՑ-ը ու մնացած այլ կառույցները մեզ համար այս պահին երրորդական են: Մեր հիմնական խնդիրը մեր հայրենիքում մեծ փոփոխություն բերելն է: Իսկ թե ինչ ապօրինություններ կարող են անել, մենք չենք ուզում քննարկել: Մի բան է ցավալի, որ հետո դժվար է լինելու ներդրողին համոզել, որ երկիրը դզվել է, երկիրը հարգում է անձնական սեփականության իրավունքը, եկեք ներդրումներ արեք այստեղ: Ապագա կառավարության գործերը դժվարացնում են այնքանով, որ ամենամեծ բիզնեսների ունեզրկման փորձերով իրենք ընդհանուր երկրի վարկանիշն են կորցնում»,- ասաց Նարեկ Կարապետյանը:
Մեկ այլ լրագրող էլ թվարկեց պաշտոնապես հրապարակված մի շարք տեղեկություններ, որոնց համաձայն Կարապետյանների կառավարման օրոք ՀԷՑ-ը հավելագրումներ է արել, ապա հետաքրքրվեց՝արդյոք սա չի՞ հակասում ձեր «կուշտ ենք ու հարուստ ենք կերպարին»: Ի պատասխան՝ Կարապետյանն ասաց. «Հաշվիչների 70 տոկոսը փոխվել է, իսկ 30 տոկոսը պետք է փոխվի, որ ապահովվի: Հավելագրումների կորուստը մեր կառավարման ժամանակ մոտ 40 միլիոն դոլար տարեկան հետ ենք տվել սակագնին, կորուստ ենք իջեցրել: Սա չէ՞ ձեր ասած հագեցած լինելու գրավականը: Սամվել Կարապետյանը 10 տարվա ընթացքում, համեստ հաշվարկներով, 200 միլիոն դոլար սակագնին է վերադարձրել կորստի նվազեցման հաշվին: Ինչ վերաբերում է տեղային հավելագրումներին, ովքեր անում են, պետք է խստորեն պատժվեն, որ նման բան չանեն: Բայց մեր տեղեկություններով՝ հավելումների չեմպիոնը հիմա ուրիշ կառավարիչներ են»:
Կարդացեք նաև
Արփինե ՍԻՄՈՆՅԱՆ
