Քիչ հետո ուղղաթիռով Գյումրի կժամանի Ֆրանսիայի նախագահ Էմանուել Մակրոնը, որն իր այցը կսկսի Գյումրու ֆրանսիական թեքում ունեցող թիվ 10 դպրոցից։
Նա կշրջագայի նաև Գյումրու պատմական կենտրոնով, ծաղկեպսակներ կխոնարհի երկրաշարժի զոհերի հիշատակին ու Վարդանանց հրապարակում կմասնակցի համերգի` նվիրված հայ-ֆրանսիական բարեկամությանը։
Կարդացեք նաև
Հիշեցնենք, որ համերգի կազմակերպման նպատակով կառավարությունը մոտ 393 մլն դրամ, այսինքն՝ ավելի քան մեկ միլիոն դոլար է հատկացրել։ Հնչելու են հայկական ու ֆրանսիական թեմատիկ երգեր՝ Հայաստանի պետական սիմֆոնիկ նվագախմբի նվագակցությամբ։
Այս պահին Գյումրիում հորդառատ անձրև է, նկատելի է, որ բազմաթիվ հյուրեր են եկել քաղաք՝ համերգին մասնակցելու։ Վարդանանց հրապարակը չորս կողմից հսկում են ոստիկանները։ Նրանք հսկողություն են իրականացնում նաև Սուրբ Յոթ վերք եկեղեցու մոտ՝ ամենայն հավանականությամբ այն պատճառով, որ հավատացյալները պատրաստվում են բարձրաձայնել Միքայել Սրբազանին ապօրինի կալանքի ենթարկելու թեման։ Հավատացյալները պահանջում են վերջ դնել Շիրակի թեմի առաջնորդի նկատմամբ ապօրինի հետապնդմանը և նրան ազատ արձակել։
Նունե ԱՐԵՎՇԱՏՅԱՆ
