«Մենք տեղյակ ենք խնդիրների մասին, արդեն ներկայացրել եւ ասել ենք։ Ինչ անհրաժեշտ է, գրված է «Առաջարկ Հայաստանին» ծրագրում, որը կազմված է ժողովրդի կողմից։ Աշխատել են մեր լավ մասնագետները։ Ինչ ես ասում եմ, մի բան էլ ավելի լինելու է։ Կարեւորը՝ թող վստահեն, տան եւ պահանջեն։ Ձեւն ու հնարավորությունը գիտենք, ցանկություն էլ ունենք»,- Աբովյան քաղաքում դեպի Բարեկամության հրապարակ քայլերթի ժամանակ ասաց ԲՀԿ առաջնորդ Գագիկ Ծառուկյանը՝ պատասխանելով լրագրողի հարցին, թե ո՞րն է լինելու այն առաջարկը, որ մարդկանց դեմքին կրկին ժպիտ գա։
«Երաշխավորված խաղաղություն, Բարգավաճ Հայաստան» կարգախոսի մասին Գագիկ Ծառուկյանն ասաց. «Դա իրականությունն է։ Որ ես ասում եմ երաշխավորված խաղաղություն, պետք է փակենք դռները բոլոր պատերազմների դեմ եւ մեր ժողովուրդը զբաղվի իր աշխատանքով, իր բարեկեցությամբ։ Անպայման պետք է լինի երաշխավորված խաղաղություն։ Մի քանի հզոր պետություններ պետք է միասին ստորագրեն, համաձայնություն տան, որ իրենք երաշխավորում են մեր ժողովրդի անվտանգությունը եւ խաղաղությունը։ Միայն այդ կերպ կարելի է երաշխավորված խաղաղություն ունենալ»։
Աշոտ ՀԱԿՈԲՅԱՆ
