«Առաջին հերթին` պետք է վերաբանակցել Խաղաղության պայմանագիրը, որը նախաստորագրվել է։ Այդտեղ կա մի քանի խնդրահարույց կետ։ Կցված չէ քարտեզ։ Մենք Ադրբեջանին կառաջարկենք 1926-1930թթ․ քարտեզը»,- «Ա1+»-ի հետ զրույցում ասաց «Լուսավոր Հայաստան» կուսակցության պատգամավորի թեկնածու Գևորգ Գորգիսյանը՝ պատասխանելով հարցին, թե ի՞նչ կանեն, եթե իրենց բախտ վիճակվի հաղթել հունիսի 7-ի խորհրդարանական ընտրություններում և իշխանություն կազմել։
«Լուսավոր Հայաստանը» նպատակ ունի կառուցել եվրոպական մոդելի պետություն, բայց ԵԱՏՄ-ի և ՀԱՊԿ-ի կազմում։ Դրա համար, նրա խոսքերով, Հայաստանին պետք է բանիմաց և տեխնոկրատ կառավարություն։ ՀԱՊԿ-ից դուրս գալը նրանց «անայլընտրանք է թվում, քանի որ մեզ որևէ այլ տեղ չեն սպասում»։
Այնուամենայնիվ մտադիր են վարել բազմավեկտոր, հավասարակշռված արտաքին քաղաքականություն։ Չփչացնել հարաբերությունները ռազմավարական գործընկեր Ռուսաստանի հետ, որովհետև Հայաստանն այդ երկրից ունի ունենք տնտեսական և ռազմական որոշակի կախվածություն։ Զուգահեռ զարգացնել հարաբերությունները ԵՄ-ի, ԱՄՆ-ի, Իրանի հետ։
Ինչ վերաբերում է հունիսի 7-ի ընտրությունների արդյունքում ձևավորվելիք խորհրդարանին, Գևորգ Գորգիսյանն ասում է, եթե անցնեն ԱԺ, կոալիցիա չեն կազմի «Քաղաքացիական պայմանագիր» կուսակցության հետ։ Մյուս ուժերի հետ կկազմեն։ Պարզապես «Հայաստան» դաշինքի դեպքում ունեն մի պայման՝ Ռոբերտ Քոչարյանը չդառնա վարչապետ։
