Անկախ դատարաններ և խորքային վեթինգ: Սա իրավական ոլորտին վերաբերող «Հանուն Հանրապետության» կուսակցության նախընտրական խոստումներից է: Կուսակցությունը հանձնառել է նաև 1999-ի և 2008-ի ոճրագործությունների ամբողջական հետաքննություն, պետություն-եկեղեցի տարանջատում՝ Սահմանադրությամբ։
Թեև հիշեցնենք, որ գործող Սահմանադրության հոդված 17-ով արդեն իսկ եկեղեցին անջատ է պետությունից: Այս հոդվածը սահմանում է՝ Հայաստանի Հանրապետությունում կրոնական կազմակերպություններն անջատ են պետությունից: Երաշխավորվում է բոլոր կրոնական կազմակերպությունների գործունեության ազատությունը։
Իրավական ոլորտում ինչ բարեփոխումներ է խոստանում «Նոր ուժ» ռեֆորմիստական կուսակցությունը։
Այս քաղաքական ուժը խոստանում է ստեղծել քաղաքական ազդեցությունից իրապես ազատ, պրոֆեսիոնալ իրավապահ համակարգ, դատարանների անկախության ապահովում, պայքար կոռուպցիայի և հովանավորչության բոլոր դրսևորումների, մասնավորապես՝ «էլիտար» կոռուպցիայի դեմ, պետական և համայնքային գնումների քաղաքականության թափանցիկության և հաշվետվողականության ապահովում։
Կարդացեք նաև
«Նոր ուժը» խոստանում է նաև ընտրական համակարգի կատարելագործում, մասնավորապես՝ տեղական ինքնակառավարման մեջ մեծամասնական ընտրակարգի և տարածքային տարրերի ներդրման հարցի հանրային քննարկում, տեղական ինքնակառավարման ապահովումն ու զարգացումը, վերջին տարիներին կենտրոնական իշխանության և կառավարող ուժի կողմից ՏԻՄ-ի դեմ ագրեսիվ և հակաօրինական միջամտության բացառումը, ավագանու ինստիտուտի ուժեղացումը։
Այս քաղաքական ուժը խոստանում է նաև անկախ սահմանադրական մարմինների՝ Մարդու իրավունքների պաշտպանի, Սահմանադրական դատարանի, Կենտրոնական ընտրական հանձնաժողովի, Հեռուստատեսության և ռադիոյի խորհրդի, Հաշվեքննիչ պալատի, Բարձրագույն դատական խորհրդի, Կենտրոնական բանկի ապաքաղաքական զարգացումը։
Ինչպես նաև 2020 թ․ 44-օրյա պատերազմի (ինչպես նաև 2021 թ․ մայիսի, 2022 թ․ սեպտեմբերի, 2023 թ․ սեպտեմբերի և այլ ռազմական էսկալացիաների) բոլոր հանգամանքների վերհանումը, քաղաքական կաշկանդվածությունից զերծ քննությունը, իրավական և քաղաքական գնահատականը։
Արփինե ՍԻՄՈՆՅԱՆ
