Ermenihaber.Թուրքիայի նախագահականի հանրային կապերի վարչությունը հայտնում է, որ երկրի նախագահ Ռեջեփ Թայիփ Էրդողանը հեռախոսազրույց է ունեցել մի շարք երկրների ղեկավարների, այդ թվում՝ ԱՄՆ նախագահ Դոնալդ Թրամփի հետ։
Բազմակողմ հեռախոսազրույցին մասնակցել են նաև Բահրեյնի թագավոր Համադ բին Իսա Ալ Խալիֆան, Արաբական Միացյալ Էմիրությունների (ԱՄԷ) նախագահ շեյխ Մոհամմեդ բին Զայեդ Ալ Նահյանը, Կատարի էմիր շեյխ Թամիմ բին Համադ Ալ Թանին, Եգիպտոսի նախագահ Աբդել Ֆաթահ էս-Սիսին, Սաուդյան Արաբիայի գահաժառանգ արքայազն Մուհամմեդ բին Սալմանը, Հորդանանի թագավոր Աբդալլահ II-ը, Պակիստանի գլխավոր շտաբի պետ Ասիմ Մունիրը, ինչպես նաև ԱՄՆ կառավարության ներկայացուցիչներ։
Գործընթացի առանցքում եղել են Իրանին և Մերձավոր Արևելքին առնչվող վերջին զարգացումները։ Էրդողանը նշել է, որ Թուրքիան մշտապես կողմ է խնդիրների կարգավորմանը դիվանագիտական ճանապարհով և գոհունակություն է հայտնել, որ Իրանի հետ դիվանագիտական գործընթացը հասել է ԱՄՆ նախագահ Թրամփի մատնանշած մակարդակին (խմբ. «Կառուցողական են»)։
Ըստ Թուրքիայի նախագահի՝ սպասվող համաձայնությունը կապահովի ազատ տեղաշարժը Հորմուզի նեղուցով, ինչը կնպաստի տարածաշրջանի կայունությանն ու կթեթևացնի համաշխարհային տնտեսության բեռը։
Կարդացեք նաև
Թուրքական պետության ղեկավարը շնորհակալություն է հայտնել բանակցային գործընթացին նպաստած երկրներին և հավելել, որ Անկարան պատրաստ է ցանկացած աջակցություն ցուցաբերել Իրանի հետ հնարավոր համաձայնագրի կիրարկման փուլում։ Նա վստահություն է հայտնել, որ ժամանակի ընթացքում լուծումներ կգտնվեն նաև խնդրահարույց թվացող այլ հարցերի, այդ թվում՝ Իրանի միջուկային ծրագրի շուրջ։
«Թուրքիան ցանկանում է թևակոխել մի նոր շրջան, որտեղ տարածաշրջանի երկրները սպառնալիք չեն հանդիսանա միմյանց համար։ Արդար խաղաղությունը պարտվողներ չի ունենա»,- հավելել է Էրդողանը։
