Սահմանադրական դատարանի կայքից տեղեկանում ենք, որ ՍԴ-ն մասնակի բավարարել է «Ուժեղ Հայաստանի» միջնորդությունը՝ պահանջելով տրամադրել ընտրություններին մասնակցած անձանց ամբողջական տվյալները՝ այն անձանց վերաբերյալ, որոնց տվյալներն ու քվեարկության վայրերը պահվել են գաղտնի, և որոնց ընդհանուր թիվը կազմում է 16 738 անձ։
ՍԴ-ի որոշմամբ՝ նշված տվյալները ՆԳՆ-ն պետք է տրամադրի մինչև այսօր՝ ժամը 18:00-ը։
ՆԳՆ-ից նաև պահանջվել է ներկայացնել, թե համապատասխան ընտրական ցուցակներում բնակության վայրի հաշվառումից ժամանակավորապես քանի անձ է հանվել, այդ անձանցից քանիսի տարիքային խումբն է համապատասխանել 18–23 տարեկանին, ինչպես նաև՝ ինչ իրավական, տեխնիկական և կազմակերպական վերահսկողական մեխանիզմներ են գործել՝ բացառելու համար այդ անձանց կողմից երկու կամ ավելի անգամ քվեարկությանը մասնակցելու հնարավորությունը։
Մեկ այլ աշխատակարգային որոշմամբ էլ Սահմանադրական դատարանը դիմել է ԱԱԾ-ին՝ պահանջելով տվյալներ Հայաստանի Հանրապետության սահմանը հատած անձանց վերաբերյալ, մասնավորապես՝ ՀՀ մուտք գործած և 18 տարին լրացած քաղաքացիների թվային տվյալները։
