Տիգրան Արզաքանցյանն ու Նատալյա Ռոտենբերգն այլևս պաշտոնապես ամուսնալուծված են։ Գեղարքունիքի մարզի ընդհանուր իրավասության դատարանն այսօր հրապարակել է վճիռը՝ բավարարելով Ռոտենբերգի հայցը։ Տեղեկությունը Փաստինֆո-ի հետ զրույցում հաստատեց Նատալյա Ռոտենբերգի փաստաբան Հասմիկ Մարտիրոսյանը։
Հիշեցնենք, որ զույգը միասին ապրել է 8 տարի, մայիսի 15-ին Նատալյա Ռոտենբերգը հայց է ներկայացրել դատարան՝ ամուսնալուծության պահանջով։
Փաստաբան Հասմիկ Մարտիրոսյանի համար անհասկանալի է՝ ինչու է նման աղմուկ այդ հարցի շուրջ, ընդամենն իրավական կարգավիճակի փոփոխություն է,մի դեպքում՝ ունեն գրանցված ամուսնություն, մյուս դեպքում՝ ոչ, սովորական ամուսնաընտանեկան հարաբերություններ են և զարմանալու, իրարանցման, աղմուկ բարձրացնելու, հանրության ուշադրություն գրավելու պատճառ չի տեսնում։ Ինչ վերաբերում է ՔԿ-ում քննվող քրեական վարույթին, ապա փաստաբանը տեղեկություն չունի վարույթի ընթացքից, Տիգրան Արզաքանցյանի և Նատալյա Ռոտենբերգի մասնակցությամբ առերեսումներ չեն եղել, տեղեկություն չկա, թե Արզաքանցյանն ինչ կարգավիճակ ունի։ Միակ գործողությունը՝ Նատալյա Ռոտենբերգը տուժող է ճանաչվել, կիրառվել է պաշտպանական միջոց։
«Փաստինֆո»-ն ավելի վաղ հայտնել էր, որ Նատալյա Ռոտենբերգը հաղորդում է ներկայացրել ՆԳՆ ոստիկանության Արաբկիրի բաժին՝ հայտնելով ամուսնու կողմից իր նկատմամբ բռնության մասին։ Իրավապահ մարմիններն առայժմ չեն մեկնաբանում դեպքը՝ հղում կատարելով մասնավոր կյանքի գաղտնիությանը, Արզաքանցյանը, սակայն, այսօր պաշտոնապես հաստատել է, որ կինն իրապես հաղորդում ներկայացրել է՝ գտնվելով «չար մարդկանց» ազդեցության ներքո։ Նա պնդում է, որ որեւէ բռնություն երբեւէ չի գործադրել։
Կարդացեք նաև
Ռոտենբերգի ներկայացուցիչը հայտնել է, որ հունիսի 8-ին Ռոտենբերգի բնակության վայրից ահազանգ է ստացվել, ըստ որի՝ ամուսնու՝ Տիգրան Արզաքանցյանի կողմից, խանդի հողի վրա ծագած կենցաղային վիճաբանության ընթացքում բռնություն է գործադրվել իր նկատմամբ։ Դեպքի առթիվ նախաձեռնվել է երկու քրեական վարույթ՝ բռնության և ազատությունից ապօրինի զրկելու հոդվածներով։ Վարույթները միացվել և քննվում են մեկ վարույթում, Ռոտենբերգը տուժող է ճանաչվել։ Միևնույն ժամանակ Ռոտենբերգի նկատմամբ կիրառված են պաշտպանության միջոցներ, Տիգրան Արզաքանցյանը չի կարող մոտենալ Նատալյա Սերգեևնային՝ ո՛չ անձամբ, ո՛չ էլ միջնորդավորված։
Իզաբել Սահակյան
