Այս պահին «Մուլտի սթոուն»-ի տասնյակ աշխատակիցներ հավաքվել են ընկերության դիմաց և պահանջում բացել կապարակնքված աշխատավայրը։
Լրագրողների հետ զրույցում ցույցի մասնակից աշխատակիցներից մեկը վրդովված ասաց․ «Արդեն 10-րդ օրն է` գործարանը պարապուրդի է մատնված։ Ում դիմել ենք, դեռ ոչ մի պատասխան չեն տալիս։ Ճիշտն ասած՝ բոլորով՝ գործարանի աշխատակիցներով հավաքվել ենք, հասկանանք՝ այս կառավարությունը մեզ պատասխան տալո՞ւ է, թե՞ ոչ։ Կառավարությանն ասենք, որ պարոն Ծառուկյանը գործարաններ, աշխատատեղեր է ստեղծել զրոյից, քանդված գործարան կառուցել իր գումարով։ Դա նշանակում է, որ եթե գործարանն աշխատում է, պետական բյուջե էլ է գումար մտնում։ Ես էլ չգիտեմ՝ մեր աշխատակիցներին ինչ պատասխան տամ, մեր ընտանիքներն էլ մեզնից հարցնում են, պատասխան չունենք։ Գազ, ջուր, լույս, հարկեր, վարկեր են եկել, ի վերջո ի՞նչ է լինելու»։
Աշխատակիցները զգուշացրին՝ եթե իրենց այսօր պատասխան չտվեցին, կտրուկ քայլերի են դիմելու․ «Մեր ընտանիքները մեզ հետ են։ Մեր ոստիկաններին խնդրում ենք, թող դիմեն պետական մարմիններին, եթե ոչ, արդեն բաժակը լցվել է, կտրուկ քայլերի ենք դիմելու․ «Ամեն ինչի էլ պատրաստ ենք, ճարներս կորցրել ենք, եթե մեզ երկիրը չի ուզում աջակցել, մենք ամեն ինչ պիտի անենք, որ մենք մեր ընտանիքները կարողանանք պահել։ Տասն օր է պարապուրդի համար նստած ենք, ոչ մեկը մեզ չի ասել, որ մեր գումարները վճարելու են։ Պարտադիր պիտի իջնենք կառավարության շենքի դիմա՞ց, ինչի՞ այս ժողովուրդը ՀՀ ժողովուրդը չէ՞։ Ժողովրդավար երկրում չենք ապրո՞ւմ։ Երևի իրենց դուր է գալիս, որ գնանք կառավարության շենքի մոտ, ցույց անենք, ճանապարհներ փակենք, հետո ասեն, թե ինչի համար եք անում»։
«Մուլտի սթոուն»-ի աշխատակիցները զգուշացրին՝ մեկ ժամից իրենց պատասխան չտան, դիմելու են կտրուկ գործողությունների։
Կարդացեք նաև
Գործարանի աշխատակիցները վրդովված նշում են՝ մինչև հիմա իրենց հստակ բան չեն ասում, որ իմանան՝ երբ է գործարանը բացվելու, հնարավորություն ունենալո՞ւ են աշխատելու, թե՞ չէ։ Գործարանի աշխատակիցներից մի կին էլ ասաց․ «Մեր միակ եկամտի աղբյուրն այս գործարանն է։ Կոմունալ ենք վճարում, ուսանող պահում, հիվանդ մարդիկ ենք պահում։ Խնդրում ենք՝ պարոն Փաշինյանը թող գործարանը բացի, մենք դուրս գանք աշխատանքի։ Անհնար է այսպես ապրել, երեք օրից բոլորիս հոսանքն են անջատելու։ Եթե չի բացվելու, թող ասեն, գնանք այլ գործ գտնենք»։
Խաղաղ ցույցի մասնակիցներից մեկը, դիմելով ծառայություն իրականացնող ոստիկանին, հարցրեց՝ արդյոք չունի՞ մարզպետի հեռախոսահամարը, գուցե նա պատասխան տա, այդ ժամանակ ցույցի մեկ այլ մասնակից այսպես արձագանքեց․ «Մարզպետը կապ չունի, սա մի մարդ է ասել, էդ մարդն էլ ոչ մի բան չի ուզում անել, որովհետև մենք Գագիկ Ծառուկյանի աջակիցն ենք, և ուզում է, որ սոված մնանք։ Նույնիսկ քննչականն այս ամենի հետ գործ չունի, այն օրը քննչականի դիմաց էինք»։
Ցույցի մասնակիցներն ասում են՝ իրենք իրենց քաղաքական հարցերը թող լուծեն, ժողովուրդն ի՞նչ մեղք ունի։ Վստահեցրին՝ օրինական աշխատում են՝ ամեն պահանջը բավարարելով։
«Մուլտի սթոուն»-ի աշխատակիցների բողոքի ցույցն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
