ՀԱՊԿ-ի մասնակցությունը Լեռնային Ղարաբաղի շուրջ հակամարտությանը հնարավոր չէր, քանի որ անգամ Հայաստանը չէր ճանաչում այդ տարածքը։ Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։
«Մի ժամանակ Հայաստանը, կարծես, առաջարկում էր գործարկել ՀԱՊԿ-ի մեխանիզմները։ Բայց հարց է առաջանում՝ ո՞ւմ և ինչի պաշտպանության համար։ Լեռնային Ղարաբաղի՞, որը հենց Հայաստանը՝ անկախ նրանից՝ դա լավ էր, թե վատ, չէր ճանաչում ո՛չ որպես իր տարածք, ո՛չ որպես անկախ պետություն։ Դա Երևանի որոշումն էր», – «Գվարդեյսկ» երիտասարդական համաժողովում Զախարովայի խոսքն է մեջբերում «Ա1+»-ը:
Ադրբեջանի ԱԳՆ պաշտոնական ներկայացուցիչ Այհան Հաջիզադեն Մոսկվային կոչ է արել «զերծ մնալ հայ-ադրբեջանական նախկին հակամարտությունը Հայաստանի և Ռուսաստանի հարաբերությունների համատեքստում հիշատակելուց»։
«Ղարաբաղի տարածաշրջանը միջազգային հանրության, այդ թվում՝ Ռուսաստանի Դաշնության կողմից, մշտապես ճանաչվել է որպես Ադրբեջանի անբաժան մաս», – ինչպես հայտնում է «Ազատություն»-ը՝ հակադարձել է Ադրբեջանի ԱԳՆ խոսնակը՝ հավելելով. «Հայաստանի կողմից շուրջ 30 տարի օկուպացված ադրբեջանական տարածքներում ՀԱՊԿ մեխանիզմների գործարկման հարցը օրակարգային դարձնելու մշտական փորձերը, ինչպես նաև այդ հարցը Հայաստանի կողմից Ղարաբաղի ճանաչման հետ կապելը ոչ միայն հակասում է ռուսական կողմի պաշտոնական դիրքորոշմանը, այլև բացարձակ անհիմն է»:
