Հակակոռուպցիոն դատարանում «Ուժեղ Հայաստան» կուսակցության առաջնորդ Սամվել Կարապետյանի գործով դատական նիստում հանրային մեղադրողը գույքային հայց ներկայացրեց Կարապետյանի դեմ և այս գործով անցնող ևս երկու մեղադրյալի նկատմամբ։
Ըստ գույքային հայցի՝ հանրային մեղադրողը պահանջում է հօգուտ ՀՀ-ի բռնագանձել 6 միլիարդ 814 միլիոն 285 հազար 705 դրամ Սամվել Կարապետյանից, Անդրանիկ Խաչատրյանից և Վլադիմիր Թարջումանյանից։
Կարդացեք նաև
Կարապետյանի պաշտպանն ասաց, որ հայցադիմումը ենթակա է վերադարձման, քանի որ չի համապատասխանում օրենքով սահմանված պահանջներին, չի բխում Կարապետյանին ներկայացված ապօրինի մեղադրանքի ձևակերպումից։ Ըստ պաշտպանի՝ հայցադիմումում հստակ նշված չէ, թե ինչի հիման վրա է գույքային հայցը կառուցվում։
Նիստը նախագահող դատավոր Վահե Դոլմազյանն էլ ասաց, որ այս փուլում չեն քննարկում հայցի հիմնավորվածությունը, դա կարվի ապացույցների հետազոտությունից հետո:
Փաստաբանը նաև հավելեց, որ հայցադիմումում երկու ապացույց կա, որը կարող է տեսականորեն հայցի հիմք լինել, սակայն երկուսն էլ անթույլատրելի, ապօրինի ապացույցներ են։ Ըստ նրա՝ օպերատիվ-հետախուզական մարմնի գործողությունների արդյունքները չեն կարող օգտագործվել, բայց օգտագործվել են։
Պաշտպաններից Արմեն Ֆերոյանն էլ հավելեց, որ նույնիսկ եթե կա առաջադրված մեղադրանք, դրանից հետո տեղի են ունեցել էական հանգամանքների փոփոխություններ։
«Կա հարկային մարմնի կողմից տրված պաշտոնական փաստաթուղթ, որով հարկային պարտավորությունները զրոյական են։ Դատախազը բերի ասի՝ այսքան հարկային պարտավորություն չկատարելու համար ներկայացնում եմ գույքային պահանջ։ Դա հանրության շրջանում իմիտացիա ստեղծել է, իբր՝ տեսեք, Սամվել Կարապետյանի դեմ ներկայացրել ենք գույքային պահանջ։ Այն փաստարկված չէ ու անհիմն է, ենթակա է վերադարձման»,- ասաց նա։
Դատարանը որոշեց, որ ներկայացված հայցադիմումը համապատասխանում է օրենքի պահանջներին և ենթակա է ընդունման։ Իսկ գործով մեղադրյալներին ճանաչեց գույքային պատասխանող:
Արփինե ՍԻՄՈՆՅԱՆ
