Հակակոռուպցիոն դատարանում Վահե Դոլմազյանի նախագահությամբ «Ուժեղ Հայաստան» քաղաքական ուժի առաջնորդ Սամվել Կարապետյանի, Անդրանիկ Խաչատրյանի և Վլադիմիր Թարջումանյանի գործով նախորդ դատական նիստում պաշտպանական կողմը միջնորդել էր դատարանին մեղադրյալներին հունիսի 7-ին կայանալիք ԱԺ ընտրությունների օրը քվեարկությանը մասնակցելու իրավունք ընձեռել և գործի շրջանակներում դատարանում գտնվող անձնագրերը վերադարձնել տերերին։
Դատարանը Սամվել Կարապետյանի մասով միջնորդությունը բավարարեց մասնակի։ Նախագահող դատավորը հայտարարեց, որ քանի որ ընտրություններին մասնակցում են միայն ՀՀ քաղաքացիները, դատարանը որոշում է Սամվել Կարապետյանին վերադարձնել միայն Հայաստանի Հանրապետության անձնագիրը, իսկ մյուս երկուսը մնում են դատարանում։
Նկատի առնելով, որ Սամվել Կարապետյանը հաշվառված է Լոռու մարզի Տաշիր քաղաքում, սակայն փաստացի բնակվում է Երևան քաղաքում, հունիսի 7-ին ընտրություններին մասնակցելու նպատակով Պրոբացիոն ծառայությանը կուղարկի համապատասխան փաստաթուղթ, որպեսզի իմանան, թե ուր և որ ժամին են ուղեկցելու։ Այդ նպատակով ծառայությունը և պաշտպանական կողմը կապ կհաստատեն և կպայմանավորվեն։
Այսքանով դատական նիստը հետաձգվեց։ Հաջորդ նիստը կկայանա հունիսի 12-ին, ժամը 14։00-ին։
Կարդացեք նաև
Նիստից հետո Սամվել Կարապետյանը Aravot.am-ի հարցին, թե հունիսի 7-ին որտե՞ղ է իր ընտրական իրավունքն իրականացնելու՝ Տաշիրում, որտեղ գրանցված է, թե՞ Երևանում, որտեղ փաստացի բնակվում է, պատասխանեց․ «Ըստ բնակության վայրի, չնայած ուրախ կլինեի՝ գնայի, գյուղում ընտրեի»։
Աշոտ ՀԱԿՈԲՅԱՆ
