«Լավ է, որ տեղեկացված եք եղել ադրբեջանցի զինվորի՝ ՀՀ սահմանը հատելու մասին, բայց ի՞նչ եք արել այդ տեղեկության հետ։ Երեկ իմ գործընկեր Գառնիկ Դանիելյանի հետ գնացել էինք Շաքի։ Ահա, թե ինչ պարզեցինք՝ բնակիչները տեղեկացված չեն եղել, տեղեկացված են եղել հովիվները, որպեսզի, եթե արտառոց մեկին տեսնեն, տեղեկացնեն»,- ԱԺ-ում հայտարարությունների ժամին նշեց «Հայաստան» խմբակցության պատգամավոր Քրիստինե Վարդանյանը՝ անդրադառնալով Շաքի բնակավայրում տեղի ունեցածին։
Հիշեցնենք՝ ըստ պաշտոնական հաղորդագրության՝ սեպտեմբերի 29-ին Ադրբեջանի պետական անվտանգության ծառայությունը Հայաստանի Ազգային անվտանգության ծառայությանը տեղեկացրել է, որ Ադրբեջանի զորամասերից մեկի զինծառայողը անհայտ հանգամանքներում լքել է ծառայության վայրը։ Հոկտեմբերի 1-ին՝ ժամը 14։15-ին, ՀՀ ՆԳՆ 112 օպերատիվ կառավարման կենտրոն ահազանգ է ստացվել, որ Սյունիքի մարզի Շաքի բնակավայրում կրակել են ՀՀ քաղաքացու ոտքին։
Քրիստինե Վարդանյանը նաև ասաց, որ Շաքիում պարզել են, որ իրականացվել է ռազմական ոստիկանության խստացված հսկողություն ճանապարհների վրա, ու ասաց․ «Գիտե՞ք՝ ինչու բնակիչները տեղեկացված չեն եղել, որևէ որոնողական տեսանելի գործողություններ չեն իրականացվել և որևէ գործիքակազմի կիրառմամբ չեն իրականացվել այդ գործողությունները, որովհետև քաղաքացիների անվտանգությունը ստորադասվել է Նիկոլ Փաշինյանի քաղաքական օրակարգին»։
Կարդացեք նաև
ԱԺ նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
