Վերա Թարիվերդիեւա. «Եթե Ադրբեջանի «սեւ» ցուցակում չլինեմ, շատ կնեղանամ»

Վերա Թարիվերդիեւա. «Եթե Ադրբեջանի «սեւ» ցուցակում չլինեմ, շատ կնեղանամ»

Ապրիլի 21-25-ը Արցախում անցկացվել են «Թարիվերդիևի երաժշտության օրեր»: Անվանի կոմպոզիտոր, Ռուսաստանի ժողովրդական արտիստ, բազմաթիվ ֆիլմերի երաժշտությունների հեղինակ Միքայել Թարիվերդիեւի տիկինը՝ «Միքայել Թարիվերդիև» բարեգործական հիմնադրամի նախագահ Վերա Թարիվերդիեւան անչափ տպավորված է արցախյան հանդիպումներով:

Վերա Թարիվերդիևան, միջոցառման մտահղացման հեղինակ, բանաստեղծ, հասարակական գործիչ Վիկտոր Կոնոպլյովը եւ երգիչ, Թարիվերդիևի ստեղծագործությունները կատարող Սար (Սարիբեկ) Սարգսյանն այսօր «Տեսակետ» ակումբում խոսեցին Թարիվերդիևի երաժշտության օրերի, այդ միջոցառման նշանակության մասին:

Taiverdiev_2

Վերա Թարիվերդիեւան նշեց, որ սիրով է այցելել Արցախ, քանի որ դա իր ամուսնու ծնողների հայրենիքն է: «Շատ էի ցանկանում, որ Շուշիում եւս համերգ լինի, որովհետեւ ամուսնուս ծնողները սերում են Արցախից, ուզում էի տեսնել այդ հողը: Ղարաբաղյան միջոցառումները անսովոր էին, որովհետեւ ոչ թե զուտ համերգներ էին, այլեւ հանդիպումներ դպրոցների, տեղի հանրության հետ: Մենք շատ տպավորված ենք՝ Բերձոր, Ստեփանակերտ, Շուշի, Գիշի… Երեխաները, ուսուցիչները ծրագրեր էին կազմել Միքայել Լեոնիչի մասին: Ինձ Ղարաբաղում ցնցեց մի քանի բան. այնտեղ դպրոցները դոմինանտող նշանակություն ունեն Արցախի մշակութային կյանքում: Օրինակ, ապշած եմ Ստեփանակերտի Գրիբոյեդովի անվան դպրոցը տեսնելով: Հիասքանչ ժամանակակից դպրոց էր, տաղանդավոր երեխաներով ու մանկավարժներով: Ընդհանրապես Ղարաբաղի ժողովուրդը ինձ զարմացրեց իր ջերմությամբ, երեւի մարդիկ մահը տեսել են, դրա համար արժեւորում են կյանքը: Մեզ ընդունեց նաեւ Ղարաբաղի նախագահը, որը մեր միջոցառումներին մեծ աջակցություն ցուցաբերեց, ասաց՝ կարող ենք անգամ առանց առիթի գալ Ղարաբաղ, թեկուզ մուրաբա եփելու համար: Մենք դպրոցներում թողեցինք Թարիվերդիեւի նոտաները»,-նշեց տիկին Թարիվերդիեւան:

Հարցին՝ չի՞ վախենում Ադրբեջանի սեւ ցուցակում հայտնվելուց, չէ՞ որ Ղարաբաղ այցելող հայտնի մարդիկ Ադրբեջանի կողմից persona non grata են ճանաչվում, Վերա Թարիվերդիեւան ժպտալով պատասխանեց. «Եթե ես չհայտնվեմ այդ սեւ ցուցակում, շատ կվիրավորվեմ»:

Վիկտոր Կոնոպլյովը նշեց, որ Թարիվերդիեւի երաժշտությամբ մանկուց է տարված եղել, իսկ երբ Աստծո կամոք հանդիպել է տիկին Վերայի հետ, որոշել է, որ անպայման Ղարաբաղյան միջոցառումներ անցկացնի նրա հետ միասին: «Արցախի կրթության նախարարության հետ ես վաղուց եմ համագործակցում: Թարիվերդիեւի երաժշտության հինգ օրերի շրջաններում եղանք Արցախի տարբեր դպրոցներում, համալսարանում, երաժշտական ուսումնարանում մեզ ապշեցրեց գրական ռուսերենի իմացությունը, նման լեզու անգամ մեզ մոտ չես հանդիպի»,- ասաց Կոնոպոլյովը: Նա լրագրողներին նվիրեց իր «Հայաստանը սիրո աղբյուր» գիրքը:

Սար Սարգսյանը եւս հիացմունքով խոսեց Թարիվերդիեւյան օրերի մասին, ասում է՝ կա՞ ավելի ազդեցիկ բան, երբ հեռավոր գյուղի դպրոցականները գիտեն Թարիվերդիեւի երաժշտությունը, հուշերը, կենսագրությունը, նկարում են նրա երաժշտության տակ: Նա ընդգծեց մասնավորապես Բերձորում, Գիշի գյուղում կայացած միջոցառումները: Սար Սարգսյանը նաեւ մենահամերգ ունեցավ Ստեփանակերտի մշակույթի եւ երիտասարդության պալատում:

Հիշեցնենք, որ հունվարի 27-ին Թարիվերդիեւյան մեծ համերգ կայացավ նաեւ Երեւանում: Տիկին Թարիվերդիեւան պատասխանելով լրագրողի հարցին, ասաց, որ պատրաստ են Հայաստանով մեկ շրջել Թարիվերդիեւյան երաժշտությամբ: Սակայն, նրա բառերով. «Ամեն տեղ չէ, որ կարելի է գալ առանց հրավերի, օրինակ, Ղարաբաղ կարող ենք առանց հրավերի գնալ, թեկուզ մուրաբա եփելու»:

Գոհար ՀԱԿՈԲՅԱՆ

 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք