ՀՀ նախագահ Սերժ Սարգսյանը «Արմնյուզին» տված իր հարցազրույցում հորդորել էր ընդդիմությանը, որ այս լարված իրավիճակում մի քիչ զուսպ լինեն՝ իշխանությանը քննադատելիս: Նա ասել էր, որ Ալիեւը,երբ ասում է, որ Հայաստանում մարդ չի մնացել՝ կրկնում է ընդդիմության խոսքերը, ուստի պետք է զգույշ արտահայտվել:
Aravot.am-ը ՀԱԿ վարչության անդամ Վահագն Խաչատրյանին հարցրեց, թե հետեւելո՞ւ է Սերժ Սարգսյանի հորդորին, ընդունելի՞ է դա իր համար, թե՞ ոչ: Պարոն Խաչատրյանը պատասխանեց. «Եթե խոսքը վերաբերում է նրան, որ մենք զուսպ չենք, դա արդեն իր գնահատականն է: Մենք շատ ավելի զուսպ ենք, մենք շատ ավելի պետության մասին անհանգստացող ենք: Մեր ելույթներում, մեր խոսքերում չափից ավելի կոռեկտություն կա: Մենք նաեւ հաշվի ենք առնում, որ մենք ՀՀ քաղաքացի ենք, եւ երկրի անվտանգության մասին մտածող ենք: Այն, որ Ադրբեջանի վարած քաղաքականության մեջ հաշվի են առնում մեր ելույթներում հնչած մտքեր, դա զարմանալի է: Զարմանալի է, որ իր կողմից այդպիսի խոսքեր են հնչեցվում, որովհետեւ չեմ կարծում, որ Ադրբեջանն իր ռազմավարական հարցերը լուծելուց կամ քաղաքականություն մշակելուց այլ ինֆորմացիայի աղբյուրներից չի օգտվում, օգտվում է միայն մեր ելույթներից եւ տվյալներից: Դա պարզապես ծիծաղելի է: Դժվար չի որեւէ մեկին, ով սովորական հնարավորություն ունի ինտերնետից օգտվելու, պարզապես Հայաստանի ցանկացած պետական մարմնի ինտերնետային կայքից օգտվելուց համապատասխան եզրակացություններ անել: Նույնը անում ենք մենք՝ Ադրբեջանի հետ կապված: Մեզ համար էլ է Ադրբեջանի վիճակագրության պաշտոնական աղբյուրները հնարավորություն տալիս Ադրբեջանի մասին եզրակացություններ անել: Ասենք, երբ խոսքը գնում է նավթի պաշարների նվազման մասին, Ադրբեջանի տնտեսության աճի մասին, գործազրկության մասին: Սերժ Սարգսյանի ասածն ինչ կոչ է, չգիտեմ, ուզում է ասի, որ մեր խոսքերում հաշվի առնենք միշտ, որ կա Ադրբեջան: Բայց մենք միշտ էլ դա հաշվի առնում ենք: Թող վերցնեն մեր ելույթները կարդան, հանրահավաքների ժամանակ հնչած խոսքերը: Այնտեղ չի եղել ՀՀ անվտանգությանը սպառնացող որեւէ խոսք կամ միտք»:
Հռիփսիմե ՋԵԲԵՋՅԱՆ
