«Ընդամենը երկու ամիս ունեինք`ադապտացնելու մեր օրենսդրությունը, որն իրականում շատ կարճ ժամանակ է: Այդ գործընթացը դեռ ընթանում է: Ուստի, այս երկու-երեք ամիսները դեռ կարելի է համարել անցումային: Որոշ խնդիրներ կային, դրանք կամաց-կամաց լուծվում են»,- «Եվրասիական տնտեսական միության շուկան առանց խոչընդոտների» թեմայով քննարկումից առաջ, լրագրողների հետ զրույցում ասաց Եվրասիական տնտեսական հանձնաժողովի կոլեգիայի անդամ Կարինե Մինասյանը`պատասխանելով հարցին` ի՞նչ խնդիրների է հանդիպում հայկական բիզնեսը:
Լրագրողները հետաքրքրվեցին նաեւ Աստանայում վերջերս կայացած ԵՏՄ անդամ երկրների նախագահների հանդիպումից, որին Սերժ Սարգսյանը չէր մասնակցում:
Կարինե Մինասյանը պաշտպանեց առավել վաղ արտահայտված պաշտոնական տեսակետը` հանդիպումը ԵՏՄ ձեւաչափում չէր եւ երեք նախագահները կիրառել են նախկինում ձեւավորված ձեւաչափը`քննարկելու իրենց երկրների միջեւ կուտակված հարցերը:
ԵՏՄ-ում միասնական արժույթի ներդրման մասին խոսելը Կարինե Մինասյանը նույնպես վաղ է համարում: ԵՏՄ պայմանագրում նախատեսվում է, որ 2025 թվականին արդեն պետք է լինի միասնական կառավարման ֆինանսական մարմին եւ քննարկվեն այդ հարցերը: Ըստ Կարինե Մինասյանի, դա տրամաբանական ժամկետ է, որ երկրների կենտրոնական բանկերը կարողանան համատեղ պայմանավորվածությունների գալ:
Կարդացեք նաև
Նելլի ԳՐԻԳՈՐՅԱՆ
