Ընդդեմ ոստիկանապետ Վլադիմիր Գասպարյանի ու նրա տեղակալ Հունան Պողոսյանի՝ վերլուծաբան Արգիշտի Կիվիրյանի հայցապահանջով դատական հաջորդ նիստը հոկտեմբերին է նշանակվել:
Այսօր վերլուծաբանի պաշտպան՝ փաստաբան Արամազդ Կիվիրյանը դիմում ներկայացրեց դատարանին, որով ավելացրեց հայցապահանջի հիմքը, հստակեցրեց հայցի առարկան:
Հայցվոր կողմը հստակեցրեց, թե ոստիկանապետի ու փոխոստիկանապետի որ արտահայտություններն են դիտարկում որպես վիրավորանք, որոնք՝ որպես զրպարտություն:
Հիշեցնենք, որ երկու պատասխանողները հայցվորի հասցեին հնչեցրել են «սադրիչ եւ խառնակիչ» արտահայտությունները, ինչը հայցվոր կողմը դիտարկում է որպես վիրավորանք:
Կարդացեք նաև
«Նույն մարդիկ լրագրողների հետ զրույցում ասել են՝ Կիվիրյանները դիվիդենտներ են շահում, խառնեցին, խառնեցին, ձեր մեջ էլ գցեցին տարակուսանք»,- այս արտահայտությունը հայցվոր կողմը համարում է զրպարտանք:
Արգիշտի Կիվիրյանն իր պատիվն ու արժանապատվությունն արատավորելու համար պահանջում է հրապարակայնորեն ներողություն խնդրել ու հերքել այն լրատվամիջոցներով, որոնցով այդ հայտարարությունը հրապարակվել է:
Կիվիրյանի պաշտպանը նաեւ այսօր միջնորդեց այդ արտահայտությունները հրապարակած լրատվամիջոցներին ներգրավել որպես երրորդ անձ, դատարանն այդ միջնորդության քննարկումը հետաձգեց: Դատական նիստն էլ հետաձգվեց, որ պատասխանող կողմը պատրաստվի դիրքորոշում հայտնել ներկայացված հայցապահանջի ու դիմումի վերաբերյալ:
Հաջորդ դատական նիստը նշանակվեց հոկտեմբերի տասնմեկին:
Արփինե ՍԻՄՈՆՅԱՆ
