Լրահոս
Օրվա լրահոսը

Խմբերգեր՝ ձայնագրված Սաղմոսավանքում. Տիգրան Մանսուրյանը նոր ձայնասկավառակ ունի (Տեսանյութ)

Հուլիս 14,2017 23:22

«Նարեկացի» արվեստի միությունն այսօր հերթական անգամ համախմբել էր երաժշտասեր հանրությանը, մշակույթի վաստակաշատ գործիչներին: Կոմպոզիտոր Տիգրան Մանսուրյանի «Խմբերգեր» ձայնասկավառակի շնորհանդեսն էր. այն թողարկվել է դեռեւս 2014 թվականին՝ «Նարեկացի» արվեստի միության կողմից և վերահրատարակվել 2016-ին: Ժողովածուի մեջ ընդգրկված խմբերգերը բազմիցս են հնչել, բայց ձայնասկավառակի տեսքով դրանք հանրությանն են ներկայացվում առաջին անգամ:

Ձայնասկավառակում ընդգրկված մաեստրոյի ստեղծագործությունների հիմքում Կոստան Զարյանի, Հովհհանես Թումանյանի, Ավետիք Իսահակյանի մի քանի բանաստեղծություններն են (առաջին խմբերգը Մանսուրյանը գրել է դեռեւս 1969թ.-ին): Խմբերգերը կատարել է Հայաստանի պետական կամերային երգչախումբը՝ գեղարվեստական ղեկավար եւ դիրիժոր Ռոբերտ Մլքեյան:

Տիգրան Մանսուրյանը լրագրողներին տեղեկացրեց, որ ձայնագրությունները կատարվել են Սաղմոսավանքում. «Լուրջ աշխատանք է կատարվել: Հարմարվել ենք Աաղմոսավանքի ակուստիկային: Կարծում եմ՝ լավ աշխատանք է արվել, արդեն քանի տասնամյակ է՝ մենք մտերիմ ենք Մլքեյանի հետ, այս սկավառակն էլ դրա վկայությունն է»:

Ռոբերտ Մլքեյանն էլ իր հերթին անկեղծացավ՝ աննկարագրելի զգացում է ունենում մաեստրոյի հետ Երեւանում եւ Գյումրիում զբոսնելիս. «Մարդիկ անընդհատ կանգնեցնում են. մեկը ժպտում է, մյուսը՝ ցանկանում մաեստրոյի ձեռքին կպնել, մեկ ուրիշն էլ բարի խոսք է ասում: Հրաշալի է, երբ ժողովուրդը սիրում է իր վարպետին, խոնարհվում նրա առաջ, հասկանում, որ նա իր ազգի մշակույթի պատմությունն է ստեղծել իր կենդանության օրոք»:

Տիգրան Մանսուրյանը նաեւ ասաց, որ իր ստեղծագործական կյանքը եռում է: Իսկ թե առաջիկայում ինչ է հանրությանը ներկայացնելու մաեստրոն, առայժմ փակագծերը չի բացում:

Մանրամասն՝ տեսանյութում:

Լուիզա ՍՈՒՔԻԱՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2017
Երկ Երե Չոր Հնգ Ուրբ Շաբ Կիր
« Հուն   Օգո »
 12
3456789
10111213141516
17181920212223
24252627282930
31