Խորհրդարանի արտահերթ նիստի ընթացքում ներկայացվելու է որոշման մի նախագիծ, ըստ որի պիտի ստեղծվի ԱԺ ժամանակավոր հանձնաժողով, որը Վերահսկիչ պալատի օգնությամբ կուսումնասիրի «Արմենիա» եւ «Անի» հյուրանոցների, կոնյակի գործարանի գործարքների մանրամասները եւ «Հայկական ավիաուղիների» 1996- 98 թթ. ֆինանսական գործունեությունը եւ ԱԺ-ին եզրակացություններ ու տեղեկանքներ կներկայացնի։
Օրակարգում է նաեւ «Հայրենիք» խմբի նախաձեռնությունը «Պետական գույքի մասնավորեցման (սեփականաշնորհման) մասին» օրենքում փոփոխություն եւ լրացում կատարելու մասին։ Փոփոխությունը մի նոր պարբերության ավելացումն է հետեւյալ բովանդակությամբ. «Այն պայմանագրերը, որոնցով պետական գույքի մասնավորեցման ընթացքում գործարքի արժեքը գերազանցում է 250 մլն դրամը, ենթակա են վավերացման ԱԺ-ի կողմից երկամսյա ժամկետում՝ առանձին օրենքով։ Գործարքը համարվում է կայացած միայն ԱԺ-ի կողմից հաստատվելուց հետո»։
Կառավարությունն անընդունելի է համարել այս օրինագիծը, մասնավորապես պատճառաբանելով նախատեսվող լրացուցիչ լիազորությունները. «ԱԺ-ի լիազորությունները սպառիչ սահմանված են ՀՀ Սահմանադրության 62-րդ հոդվածով եւ նոր լիազորությունների վերապահումն առանձին օրենքով հնարավոր չէ»։
Ա. Ի.
