Պատգամավորներին այսպիսի աչքալուսանքի արժանացրեց ԱԺ փոխնախագահ Ալբերտ Բազեյանը։ Թեեւ, պետք է նկատել, որ ուրախացողների թիվը 25-ից այդպես էլ չանցավ։
Ինչ խոսք, բոլոր հայտարարություններին անդրադառնալը բավական ձանձրալի է, ուստիեւ մեջբերումներ կանեմ մի քանիսից միայն։ Արմեն Մարտիրոսյանն ընտանեկան նպաստներ վճարելու սկզբունքը գտավ ոչ արդարացի, քանի որ հաշվառման մեջ գտնվող 33 տոկոսը ապահով եւ ամենեւին էլ ոչ կարիքավոր են։
Վահագն Խաչատրյանին սովորականի պես, անհասկանալի էր «նորընծա իշխանավորների աշխատաոճը»։ Նրան անհանգստացրել էին կոնյակի գործարանի հետ կապված նորությունները, հոկտեմբերի 17-ի կառավարության նիստը, ինչպես նաեւ նոյեմբերի 4-ի նույնատիպ նիստում «Հայկական ավիաուղիների» սեփականաշնորհման հարցի քննարկումները։
Պրն Խաչատրյանն իր հայտարարությունը եզրափակեց իրավապահ մարմիններին, դատախազությանն ուղղված կոչով, որ հիշեն իրենց պարտականությունները։ Էռնեստ Սողոմոնյանին շատ է հուզում «Կարմիր խաչի» շրջիկ ցուցահանդեսը՝ «Մարդիկ եւ պատերազմ(ներ)» (լավ չեմ հիշում, կներեք- Լ. Ա.) խորագրով։ Հուզումի ալիքը բարձրացրել է այն, որ այնտեղ 15 թվականի եղեռնի մասին հեչ չի ասվում, ոչ մի լուսանկար չի ցուցադրվում։
Կարդացեք նաև
«Հայրենիք» պատգամավորական խմբի նախագահ Էդվարդ Եգորյանը խոսեց ընտրական օրենսգրքի մասին եւ սպառնաց, որ իրենց խմբակցությունը չի մասնակցի «այդ օրենսգրքի ընդունման հետագա ձեւական քննարկումներին»։
Մկրտիչ Գիմիշյանը ազգային հեռուստատեսության «Խորհրդարանական ժամ» ծրագիրը անվանեց «Խոսրովական ժամ»՝ արժանանալով պրն Բազեյանի մեղմ դիտողությանը։
Տեր Հուսիկ Լազարյանը քրիստոնեական ներողամտություն չցուցաբերեց՝ խոսելով ընտրական օրենսգրքի նախագծի առաջին ընթերցման վերաբերյալ։ «Հանրապետություն» խմբակցության անունից մեղադրեց երկրապահներին ԱԺ կանոնակարգը խախտելու մեջ։
Արշակ Սադոյանը նորից ու դարձյալ անդրադարձավ ամեն կարգի ընտրությունների կեղծությանը եւ ԱԺՄ-ի անունից զգուշացրեց, որ թող այնպես չանեն, որ ԱԺՄ-ն բոյկոտի ընտրություններին, հա՜…
Բարեբախտաբար, մոտեցավ ժամը 18-ն անց 15-ը, եւ Ալբերտ Բազեյանը նիստն ավարտված հայտարարեց։
Լ. ԱՎԱԳՅԱՆ
