Առաջին օրերի խրոնիկա
Մոսկվայի կենտրոնական հատվածները ողողված են մոսկովյան միջազգային XXI կինոփառատոնի հսկայական աֆիշներով ու պլակատներով։ Մեկ ամիս շարունակ ռուսական գրեթե բոլոր լրատվամիջոցներով խոսվում եւ գովազդվում էր կինոփառատոնը… Հուլիսի 19-ին ժամը 19-ին «Պուշկինյան» կինոթատրոնում տեղի ունեցավ բացման պաշտոնական արարողությունը։ Ներկայացվեցին ժյուրիի անդամները՝ արգենտինացի հայտնի կինոռեժիսոր Ֆերնանդո Սոլանասը (ժյուրիի նախագահ), իտալացի ռեժիսոր Ֆլորեստանո Վանչինին, Ֆրանսիացի դերասանուհի Կատյա Չեկոն (որը ծագումով ռուս է, հիշողություններով՝ ֆրանսուհի, կրթությամբ՝ երգչուհի, աշխատում է նաեւ թատրոնում եւ հեռուստատեսությունում), ռեժիսոր, սցենարիստ, դերասան եւ պրոդյուսեր Վալերի Տոդորովսկին, Տոլոմուշ Օկեեւը՝ սովետական կինոյի դասական (ռեժիսոր Կիրգիզիայից), Իրանից կինոքննադատ Շալա Նախիդը, իսպանացի կինոռեժիսոր Անտոնիո Խիմենես Րիկոն եւ ազգությամբ լեհ օպերատոր Ադամ Գրինբերգը։
Ներկայացվեցին մրցութային ֆիլմերը։ Փառատոնի գործադիր տնօրենը 1995 թվականից կինոգործիչ Ռենատ Դավլետյարովն է։ Նիկիտա Միխալկովը փառատոնի նախագահն է։ Կինոփառատոնին արտերկրից հրավիրված են 25 հայտնի կինոգործիչներ՝ դերասաններ, ռեժիսորներ, պրոդյուսերներ, այլ փառատոների տնօրեններ։
Ռուսաստանի վարչապետ Սերգեյ Ստեպաշինն իր ելույթում կարեւորեց փառատոների դերը մշակութային կյանքում։ Նրա այդ խոսքից երեւում էր, որ ռուս ժողովրդի մի հատվածը եւս (հայերի պես) բողոքում է՝ այդքան մեծ գումարներ փառատոնի համար ծախսելու փոխարեն տվեք անապահով խավերին, թոշակառուներին, որոնք կամ չեն ստացել, կամ շատ քիչ են ստանում։
Կարդացեք նաև
ՍԱԹԻԿ ՍԵՅՐԱՆՅԱՆ
«Առավոտի» թղթակից, Մոսկվա
