Օրերս Հարվարդի համալսարանում հոկտեմբերի 27-ի իրադարձությունների վերաբերյալ դասախոսությամբ հանդես է եկել Ժիրայր Լիպարիտյանը։ Նա ասել է, որ վերջին անգամ Վազգեն Սարգսյանին հանդիպել է հոկտեմբերի 6-ին, եւ ի դեմս նրա տեսել շատ փոփոխված մի անձնավորության՝ տարբեր 96-97 թթ. Վազգեն Սարգսյանից։ «Նա սկսում էր հասկանալ, որ Հայաստանի տնտեսական ճգնաժամը չէր կարող կարգավորվել մի քանի արագ եւ վճռական գործողություններով՝ հարկերի հավաքմամբ եւ կաշառակերության դեմ պայքարով»։ Լիպարիտյանն ասել է նաեւ, թե Վազգեն Սարգսյանը տնտեսական իրավիճակի բարելավումը մասնակիորեն պայմանավորել է նաեւ Ղարաբաղի հարցի լուծմամբ։
ԲՐՅՈՒՍԵԼ՝ ԿԻՍՎԱԾ ՊԱՏՎԻՐԱԿՈՒԹՅԱՄԲ
Եվրախորհրդարանում ստեղծվել է Անդրկովկասյան հանրապետությունների հետ համագործակցության հանձնախումբ, որը գլխավորում է գերմանացի քրիստոնեա-դեմոկրատ տիկին Ուրսուլա Շլայզերը։
Կարդացեք նաև
Դեկտեմբերի 6-9-ը Բրյուսելում տեղի է ունենալու հանձնախմբի առաջին նիստը, որին հրավիրված է նաեւ Հայաստանի պատվիրակությունը։ Ու թեպետ մեր պատվիրակության կազմում ընդգրկված են բոլոր խմբակցությունների ու խմբերի ներկայացուցիչները, սակայն ֆինանսական միջոցների սղության պատճառով խորհրդարանից Բելգիա է մեկնել ընդամենը 4 հոգի։ Պայմանավորվածություն է ձեռք բերվել, որ գործելու է ռոտացիոն սկզբունքը։
Սեփ. լր.
ՄՈՒՐԱՑԿԱՆՈՒԹՅԱՆ ԴԵՄ… «ՔՇԵԼՈՎ»
Վերջին մի քանի ամիսներին Վանաձորում «լուրջ աշխատանք» է տարվում մանկական մուրացկանությունը կանխելու ուղղությամբ։ Դատական ակտերի հարկադիր կատարման Լոռու մարզային ծառայության պատերի տակ այլեւս մուրացիկ երեխաներ չեն նկատվում (այլ միայն մեծահասակներ), քանի որ նրանց արդեն «քշում» են այդտեղից։ Հակված ենք կարծելու, թե դա արդյունք է ոչ միայն նրա, որ մամուլը այդ մասին «հա գրում ու գրում էր», այլեւ, որ այդտեղ մշտապես նստող մուրացիկ մի աղջնակ, որ նաեւ երգելու փորձեր էր անում, հիվանդության արդյունքում վերջերս մահացավ՝ այլեւս չդիմանալով ցրտին, քաղցին ու առողջության քայքայմանը։
«ԼԱՎ ԽՈՐՀՐԴԱՐԱՆԱԿԱՆ ՍԵՄՈՒՇԿԱ»
Վանաձորում արեւածաղկի սերմ վաճառող մի կին, տղամարդկային կոշտ ու կոպիտ ձայնով գովազդում է ոչ միայն իր ապրանքը, այլեւ ամեն ինչ. «Լա՜վ խարակա՜ծ սեմուշկա… Անկա՜խ Հայաստանի սեմուշկա»։ Երիտասարդների հանդիպելու դեպքում «կենացները թանկանում» են ու նա ողջ ուժով բղավում է. «Երիտասարդական սեմուշկա» եւ նույնիսկ… «Լավ ֆիգուրով սեմուշկա»։ Գովազդների մշտական ցանկում, սակայն, արտասահմանյան հեռուստասերիալներն են. «Կասանդրայի», «Զամարաշկայի» «սեմուշկաները»։ Չնայած «Լաչինի միջանցք» կոչվող առեւտրի բացօթյա վայրում, կրպակներում տեղադրված ռադիոբարձրախոսներից մշտապես հնչում են ԱԺ նիստերի քննարկումները, այնուամենայնիվ, հիշյալ կինը երբեւէ չէր ասել. «Ազգային ժողովի սեմուշկա»։ Բայց… վերջերս սկսեց կանչել՝ «Լա՜վ խորհրդարանական սեմուշկա», ինչից կարելի է եզրակացնել, թե խորհրդարանի նիստերն սկսել են հեռուստասերիալների կարգավիճակ ստանալ։
Գ. ՀՈՎՍԵՓՅԱՆ,
Վանաձոր
ՍԱՄՎԵԼ ԲԱԲԱՅԱՆԸ՝ «ԱԲԻԺՆԻ՞Կ»
– Ղարաբաղում ընդդիմություն չկա, քանի որ, եթե լինի ընդդիմություն, ապա նրանք պետք է հստակ ասեն իրենց ծրագրերի եւ քաղաքական գծի մասին,- հայտարարեց ԼՂՀ նախագահ Արկադի Ղուկասյանը օրերս կայացած Արցախ-Հայաստան գործարար համաժողովից հետո: Նրա խոսքերով, «մյուս թեւում հավաքվել են «աբիժնիկները», եւ իրենք էլ չգիտեն, թե ինչ են ուզում»:
Նշելով, որ ԼՂՀ պաշտպանության նախկին նախարար, Լեռնային Ղարաբաղի Զինված ուժերի հրամանատար Սամվել Բաբայանը փորձում է իր դերն ունենալ ե՛ւ պաշտպանության ոլորտում, ե՛ւ տնտեսական հարցերում, Արկադի Ղուկասյանն ընդգծեց, որ ամեն մարդ պետք է զբաղվի իր գործով. «Ես գտնում եմ, որ Սամվել Բաբայանը պետք է զբաղվի միայն բանակով, քանի որ ի վիճակի չէ զբաղվելու ուրիշ հարցերով՝ չունենալով դրա համար ոչ համապատասխան կրթություն, ոչ ինտելեկտ, ոչ էլ փորձ»: Նա նշեց, որ Ս. Բաբայանի դեմ քրեական գործ հարուցված չէ, բայց «որոշ տեղերում նրա անունը նշվում է»: Ընդունելով, որ ինքն իրոք որոշակի խնդիրներ ունի Սամվել Բաբայանի հետ, Արկադի Ղուկասյանը հայտարարեց, որ ավելի արժանավոր անհատի է նշանակել պաշտպանության նախարար:
ԼՂՀ նախագահը նշեց, որ այսուհետ Ղարաբաղին վերաբերող հարցերը բաց են լինելու, քանի որ կյանքը ստիպում է վերանայել այդ խնդրի նկատմամբ մոտեցումը. նախկին մոտեցումը թելադրված էր պատերազմական վիճակով:
ՆՈՅՅԱՆ ՏԱՊԱՆ
