Գագիկ Թադեւոսյանը Որպես ԱԺ սոցիալական, առողջապահության եւ բնապահպանության հանձնաժողովի նախագահ՝ կոմունիստ Գագիկ Թադեւոսյանը իր երկարամյա պրպտումների արդյունքում երկու կարեւոր եզրահանգման էր եկել, որոնք հարկ գտավ ներկայացնել խորհրդարանի ամբիոնից։ Նախ՝ արեւմտյան իմպերիալիստները մեր երեխաներին դրդում են 6-րդ դասարանից սկսած՝ ապահով սեքսով ապրել։ Եվ որ պահպանակների ինստիտուտը պետք է վերացնել, քանի որ. «Ամենաապահովը մեր կարմիր խնձորի ավանդույթն է, դրանից լավ ապահովիչ չկա»։ Հավանաբար, լավ ծանոթ չլինելով հայ ժողովրդի սոցիալական ծանր վիճակին՝ ընկեր Թադեւոսյանը չի պատկերացնում, որ սեքսից առաջ կարմիր խնձոր ուտել, իրենց շատ քչերը կարող են թույլ տալ։ Արմեն Խաչատրյանը Մեկ ու կես ամիս պայքարելով նախագահին իր թիկունքին կանգնեցնելու եւ ԱԺ նախագահի լայն աթոռին մնալու համար՝ խորհրդարանի նախագահ Արմեն Խաչատրյանը՝ խախտելով իր իսկ սահմանած բարի ավանդույթը, բաց թողեց շրջագայության մեկնելու մի քանի փայլուն շանս։ Սակայն, որպես ավանդապաշտ հայ՝ երեկ նրա մեջ զարթնեց տուրիստը եւ պրն Խաչատրյանն՝ առանց լուրջ առիթի, մեկնեց… Ղարաբաղ։ Այստեղ արդեն պրն Խաչատրյանը կորոշի իր նոր երթուղին, որն, ի դեպ, շրջանցում է Շուշիի բերդը։ Հայերս Տաքարյուն հայերը չկարողացան այլ կերպ ընդունել Ֆրանսիայի Սենատի կողմից Հայոց ցեղասպանության ճանաչման փաստը, քան Հայաստանում ծնված, բայց այդպես էլ մեծանալ չհասցրած վեց գառնուկի արյունը Հայաստանում Ֆրանսիայի դեսպանատան շեմին թափելով։ Ի դեպ, անհամար ծաղիկներով եւ փուչիկներով դեսպանատունը հեղեղելուց զատ, հայերը նաեւ շենքի ներսից կիսաապշած նայող ֆրանսիացիների համար կատարեցին ավանդական քոչարին։ Միայն մենք կարող էինք այս աստիճանի ուրախանալ, որ մեզ ջարդելու փաստը երկար չեմուչումից հետո ընդունեց Ֆրանսիայի Սենատը։ ԼԻԼԻԹ ԱՎԱԳՅԱՆ